لاہور(وقائع نگارخصوصی)پاکستان تحریک انصاف(پی ٹی آئی) کے چیئرمین اور سابق وزیراعظم عمران خان نے ایک بار پاک فوج کے سابق سربراہ جنرل(ر)قمر جاوید باجوہ کو اپنی شدید تنقید کا نشانہ بناتے ہوئے کہا ہے کہ شریف اور بھٹو خاندان نے اربوں کی کرپشن کی،جنرل باجوہ نے ملک کے سب سے بڑے لٹیروں کا ساتھ دیا،باجوہ کے نزدیک کرپشن بڑا مسئلہ نہیں تھا،امید ہے اب ادارے سیاست میں مداخلت نہیں کریں گے۔
”پاکستان ٹائم “ کے مطابق امریکی خبر رساں ادارے کو خصوصی انٹرویو دیتے ہوئے عمران خان کا کہنا تھا کہ پاک فوج کی پالیسیوں کا تمام انحصار صرف ایک شخص پر ہوتا ہے،ہماری حکومت اور جنرل باجوہ میں مثبت تعلقات سے فوج کی عظیم حمایت حاصل رہی،حکومت اور عسکری قیادت کی مشترکہ کوشش سے کورونا کا بہترین انداز میں مقابلہ کیا،جنرل باجوہ چاہتے تھے کہ ہم ان چوروں کی کرپشن معاف کرکے ان کے ساتھ ملک کام کریں،جنرل باجوہ کے شہباز شریف کے ساتھ بہت قریبی تعلقات تھے،جنرل باجوہ کے شہباز شریف کے تعلقات کے نتیجے میں رجیم چینج آپریشن کی راہ ہموار ہوئی،اختیار آرمی چیف کے پاس اور ذمہ دار وزیر اعظم ہو تو نظام نہیں چل سکتا۔
انہوں نے کہا کہ پاکستان کی معیشت بری طرح برباد ہو چکی ہے،اس وقت پاکستان تاریخ کے بدترین معاشی بحران سے گزر رہا ہے،عوام کی منتخب حکومت کے پاس ذمہ داری کے ساتھ اختیار بھی ہونا چاہئے،روس یوکرین تنازعے میں ہم نے غیر جانبدار رہنے کا فیصلہ کیا،کسی ایک فریق کی حمایت کرتے تو تعلقات متاثر ہوسکتے تھے،میں نے افغانستان کی غنی حکومت کے ساتھ اچھے تعلقات کی کوشش کی،وزیر خارجہ بلاول بھٹو زرداری نے اپنا سارا وقت بیرونی دوروں پر لگایا،افغانستان کا ایک دورہ نہیں کیا۔
