حکومت نے بجلی کی قیمت میں اضافے اور سبسڈی ختم کرنے کی منظوری دیدی

اسلام آباد(وقائع نگار)پاکستان ڈیمو کریٹک موومنٹ(پی ڈی ایم )کی اتحادی حکومت نے عالمی مالیاتی ادارے(آئی ایم ایف)کے پروگرام کی بحالی کیلئے شرائط پر فوری عملدرآمد کا فیصلہ کرتے ہوئے عوام کا شکنجہ مزید کسنے کا فیصلہ کر لیا۔
”پاکستان ٹائم “ کے مطابق وفاقی کابینہ نے بجلی کی قیمت میں اضافے اور سبسڈی ختم کرنے کا پلان منظورکرلیا۔پلان کے تحت جون تک گھریلو صارفین کیلئے بجلی7روپے فی یونٹ تک مہنگی ہوگی۔پلان کے تحت مارچ 2023 سے برآمدی شعبے اور کسانوں کیلئے بجلی پر سبسڈی ختم ہوگی جبکہ برآمدی شعبے کیلئے بجلی پر 12روپے13پیسے فی یونٹ کی سبسڈی واپس ہوگی۔حکام کے مطابق جون 2023 تک بجلی صارفین سے تقریبا 250 ارب روپے ریکور کئے جائیں گے۔پلان کے تحت 3 روپے 39 پیسے فی یونٹ کا سرچارج لگے گا جبکہ سہ ماہی ایڈجسٹمنٹس کی مد میں بھی بجلی مہنگی کی جائے گی۔جون تک سہ ماہی ایڈجسٹمنٹس میں اضافے سے 73 ارب روپے حاصل ہوں گے۔سہ ماہی ایڈجسٹمنٹ میں رواں ماہ بجلی 4 روپے 46 پیسےتک مہنگی ہوگی،فروری میں ٹیرف میں اوسط اضافہ 3 روپے21 پیسے فی یونٹ بنے گا جبکہ مارچ میں سہ ماہی ایڈجسٹمنٹ میں بجلی 69 پیسے مہنگی کی جائے گی۔جون میں سہ ماہی ایڈجسٹمنٹ میں بجلی ایک روپے 64 پیسے مہنگی ہوگی، ستمبر میں سہ ماہی ایڈجسٹمنٹ میں بجلی ایک روپے 98 پیسے مہنگی ہوگی۔جون تک برآمدی شعبے،کسانوں کیلئے سبسڈی ختم ہونے سے 65 ارب روپے حاصل ہوں گے۔ برآمدگنندگان کیلئے بجلی پر سبسڈی ختم ہونے سے51 ارب روپے حاصل ہوں گے جبکہ کسان پیکچ کے تحت بجلی پر سبسڈی ختم ہونے سے 14 ارب روپے حاصل ہوں گے۔