الیکشن کمیشن کی جانب سے صدر مملکت ڈاکٹر عارف علوی کی طرف سے مشاورت کے لئے بھیجے گئے خط کا جواب بھیج دیا گیا۔ الیکشن کمیشن کی جانب سے صدر پاکستان کے خط میں استعمال ہونے والے الفاظ پر تحفظات کا اظہار کیا گیا ہے۔
اس حوالے سے ذرائع نے پاکستان ٹائم کو بتایا کہ الیکشن کمیشن نے صدر مملکت کی جانب سے لکھے گئے خط میں الفاظ کے استعمال پر شدید تحفظات کا اظہار کیا ہے۔ الیکشن کمیشن نے خط کے جواب میں لکھا ہے کہ الیکشن کمیشن ایک آزاد اور خودمختار ادارہ ہے جو آئین اور قانون پر عمل کرتا ہے۔ کمیشن عدلیہ کے تمام فیصلوں کا احترام کرتا ہے اور ان پر من و عن عمل بھی کرتا ہے۔
جوابی خط میں الیکشن کمیشن نے مزید لکھا ہے کہ صدر کی جانب سے الیکشن کمیشن کے بارے میں بے حسی کے الفاظ لکھنا مناسب نہیں۔ صدر مملکت کی جانب سے ایسے الفاظ لکھنے پر افسوس اور مایوسی ہوئی۔ہمارا ادارہ اپنی آئینی ذمے داریاں احسن طریقے سے سر انجام دے رہا ہے۔
