پاکستان ٹائم کے مطابق سابق وزیر اعظم اور چیئرمین تحریک انصاف عمران خان اور سابق وزیراعلیٰ پنجاب چوہدری پرویزالہیٰ کے ،مابین مشترکہ ملاقات ہوئی ہے، جس میں موجودہ سیاسی صورتحال، جیل بھرو تحریک اور عام انتخابات پر تبادلہ ہوا ہے۔ ملاقات میں ن لیگ کی جانب سے عدلیہ مخالف مہم کی مذمت کی گئی۔
ملاقات کے دوران چوہدری پرویز الہی نے جیل بھرو تحریک کی مکمل حمایت کی۔ دونوں رہنماو¿ں نے مسلم لیگ (ن) کے حوالے اظہار خیال کرتے ہوئے بتایا کہ ن لیگ اپنی روایت کے مطابق عدلیہ پر حملہ آور ہے۔ چیئرمین پی ٹی آئی نے اس موقع پر کہا کہ حکمران آئین کو مان رہے ہیں نہ عدالتی فیصلے تسلیم کر رہے ہیں، پی ٹی آئی کی قیادت اور کارکنوں کے خلاف جھوٹے مقدمات درج کئے جا رہے ہیں۔عمران خان نے مزید کہا کہ جیل بھرو تحریک کے تحت ملک بھر سے پارٹی رہنما، کارکن اور عوام رضاکارانہ گرفتاریاں دیں گے، قوم خوف کے بت توڑ کر میدان میں آ رہی ہے۔
ملاقات کے دوران چوہدری پرویز الہیٰ کا کہنا تھا کہ لاہور ہائیکورٹ کے فیصلے پر بھی عمل نہیں کیا جا رہا، حکمران اتحاد عمران خان سے خوفزدہ ہے، عمران خان کی عوامی مقبولیت سے خوفزدہ پی ڈی ایم ٹولہ الیکشن سے بھاگ کر آئین شکنی کا مرتکب ہو رہا ہے۔
