پاکستانی عوام پر لگنے والے ٹیکس پر آئی ایم ایف بھی تڑپ اٹھا ،پی ڈی ایم حکومت سے بڑا مطالبہ

واشنگٹن(مانیٹرنگ ڈیسک)بین الاقوامی مالیاتی فنڈ (آئی ایم ایف) کی مینیجنگ ڈائریکٹر (ایم ڈی) کرسٹالینا جارجیوا نے پاکستان میں امیر طبقے کو دئی گئی سبسڈیز ختم کرکے ان سے ٹیکس وصول کرنے پر زور دیتے ہوئے کہا ہے کہ زیادہ پیسہ کمانے والوں کو ٹیکس میں زیادہ حصہ ڈالنا چاہیے۔
غیر ملکی میڈیا کے مطابق میونخ سیکیورٹی کانفرنس میںگفتگو کرتے ہوئے آئی ایم ایف کی مینیجنگ ڈائریکٹر (ایم ڈی) کرسٹالینا جارجیوا نے سوال اٹھایا کہ پاکستان کو شدید معاشی چیلنجز کا سامنا ہے، پھر بھی پاکستان میں کاروبار کرنے والے لوگ ٹیکس کیوں ادا نہیں کرتے؟ جو لوگ زیادہ ٹیکس دے سکتے ہیں حکومت کو چاہیے کہ ان سے ٹیکس وصول کرے، پیسہ ان لوگوں پر خرچ کیا جائے جنہیں مدد کی ضرورت ہے، سبسڈی صرف ان لوگوں کو منتقل کی جائے جو واقعی اس کے مستحق ہیں، پاکستان کو قرضوں کی ری اسٹرکچرنگ نہیں سخت اقدامات کرنے کی ضرورت ہے۔کرسٹالینا جارجیوا کا کہنا تھا کہ پاکستانی عوام سیلاب سے تباہ حال ہیں، جس سے پاکستان میں تقریباً ایک تہائی لوگ متاثر ہوئے ہیں، پاکستان ایک شدید معاشی بحران کا سامنا کر رہا ہے اور آئی ایم ایف سے مدد مانگ رہا ہے، ہم چاہتے ہیں پاکستان ایک مستحکم ملک کے طور پر اقدامات کرے، کوئی ملک ایسی خطرناک جگہ پر نہیں پہنچ سکتا جہاں اسے قرضوں کی تنظیم نو کی ضرورت ہو، ہم دو اہم نکات پر زور دے رہے ہیں، پہلا نکتہ ٹیکس ریونیو ہے جو لوگ پرائیویٹ یا پبلک سیکٹر سے اچھی رقم کما سکتے ہیں انہیں معیشت میں اپنا حصہ ڈالنا چاہیے۔دوم، دولت کی منصفانہ تقسیم ہونی چاہیے۔ غریبوں کو سبسڈی دی جائے، انہیں تحفظ کی ضرورت ہے۔ امیر طبقے کو ٹیکسوں سے تحفظ اور سبسڈی نہ دی جائے۔