راولپنڈی(خصوصی رپورٹر)پاکستان مسلم لیگ (ن) کی چیف آرگنائزر مریم نواز شریف نے عدلیہ پر کڑی تنقید کرتے ہوئے کہا ہے کہ فیض کے چیلے ججز آج بھی عدلیہ میں کام کررہے ہیں، آڈیو لیک ہونے کے بعد سپریم کورٹ کے جج کو استعفیٰ دے کر عدلیہ پر لگنے والے دھبے کو مٹانا چاہیے تھا، عدلیہ بھی ایسے عناصر کا احتساب کرے کیونکہ ملک کو” ایماندار ججوں“ کی ضرورت ہے ”عمران دار ججز“ کی ضرورت نہیں،
جس دن رانا ثنا اللہ نے عمران خان کو گرفتار کرنے کا فیصلہ کیا اس دن انہیں بچانے والا کوئی نہیں ہوگا،عمران خان اور مہنگائی کو اکھٹے اٹھا کر باہر پھینکیں گے، گرفتاری دینے کیلئے شیر کا جگر چاہیے،عمران خان پہلے اسٹیبلشمنٹ اور اب عدلیہ کے کندھے پر چڑھ کر آنے کی تیاری کر رہا ہے،جو ہاتھ نواز شریف کے لئے فولاد ہوتے تھے، وہ اب عمران خان کے لئے موم کیوں بن گئے ہیں؟۔
راولپنڈی میں پاکستان مسلم لیگ (ن) کے تنظیمی کنونشن سے خطاب کرتے ہوئے مریم نواز شریف کا کہنا تھا کہ گھڑی چور نے چار سال میں ملک میں کچھ نہیں چھوڑا، عمران خان چار سال تک گھڑیاں چوری کرتے رہے۔ عمران خان نے صرف مال بنانے کا منصوبہ لگایا، ملکی تاریخ کے سب سے زیادہ قرض لئے، سب سے زیادہ قرض لے کر صرف راولپنڈی میں ایک منصوبہ نہیں لگایا،نواز شریف لندن میں ہوں یا لاہور میں، ان کے چاہنے والے اسی کو چاہتے ہیں، پنڈی کا ہرمنصوبہ نوازشریف اور شہبازشریف کی محبت کی گواہی دے رہا ہے، مشکلات پیدا کرکے کوئی اور جاتا ہے اور اسے ٹھیک نواز شریف کرتے ہیں، جب وہ مشکلات ٹھیک کردیتے ہیں اسے نکال دیا جاتا ہے، جب جب نواز شریف کو ملک ملا تیزی سے نیچے جاتا ہوا پاکستان ملا، لوگ کہتے ہیں کہ ہمارا مقابلہ عمران خان سے نہیں مہنگائی سے ہے، مہنگائی کا دوسرا نام عمران خان ہے،عمران خان نہیں تھا تو ملک میں مہنگائی بھی نہیں تھی، جب نواز شریف حکومت میں تھے تو روٹی 5 روپے، چینی 50روپے، آٹا 35 روپے اور گھی 140 روپے فی کلو سے زیادہ نہیں تھا، جب سے عمران خان آیا مہنگائی پاکستان سے جانے کا نام نہیں لے رہی، مہنگائی اور عمران خان کو اکٹھا اٹھاکر باہر پھینکیں گے،عمران خان بارودی سرنگیں آئی ایم ایف کی شکل میں بچھاکر گیا ہے، معیشت صرف زمان پارک کی ٹھیک ہوئی ہے،ملک کی معیشت تباہ ہوگئی ہے، آئی ایم ایف سے مذاکرات میں اسحاق ڈار کو نہیں بلکہ عمران خان کو بٹھانا چاہیے، ملک کا یہ حال آئی ایم ایف کی وجہ سے نہیں خاتون کھانا کی وجہ سے ہوا،ملک کی معیشت کو ٹھیک ہونے میں چند سال لگیں گے، اگر اسے مسلم لیگ ن ٹھیک نہیں کرسکتی تو پھر کوئی بھی ٹھیک نہیں کرسکتا۔مریم نواز نے عدلیہ پر تنقید کرتے ہوئے کہا کہ اس ملک کوایماندار ججز کی ضرورت ہے، عمران دار ججز کی نہیں، ہماری عدلیہ میں بہت ایماندارججز بھی ہیں، مظاہر علی نقوی اخلاقی جرات کا مظاہرہ کریں اور استعفیٰ دیں، عدلیہ کو بھی چاہئے کہ ان کا احتساب کریں، جو فیض کے جانے کے بعد بھی ان کا کام کررہے ہیں، بابا زحمت جیسے ججز کو باقی ماندہ زندگی منہ چھپا کر گزارنا پڑتی ہے، ایسے ججوں کا نام جسٹس ریٹائرڈ ثاقب نثار کی طرح لیا جائے گا۔
عمران خان کی جیل بھرو تحریک پر سوال اٹھاتے ہوئے مریم نواز نے کہا کہ کیا بزدل آدمی عوام کا لیڈر ہوسکتا ہے؟گرفتاری دینے کیلئے شیر کا جگر چاہئے اور وہ زمان پارک کے بنکر میں بزدلوں کی طرح چھپا بیٹھا ہے، لوگوں کو کہتا ہے جیلیں بھرو، خواتین اور بچوں سے کہتا ہے مجھے گرفتاری سے بچاو¿، آڈیوز تمہاری لیک ہورہی ہے اور ججز کے خلاف مہم ن لیگ چلارہی ہے؟ نوازشریف نے تو 200 پیشیاں بھگتیں، عمران خان کو عدالت بلاتی ہے تو کہا جاتا ہے میری ٹانگ خراب ہے، وہ کون سا پلاستر ہے جو 5 ماہ سے اترنے کا نام نہیں لے رہا؟ وہ قانون کے آہنی ہاتھ جو نواز شریف کے لیے فولاد کے ہوتے تھے، قانون کے ہاتھ عمران خان کے لئے نرم کیسے ہوگئے؟ جس دن رانا ثنا اللہ نے گرفتار کرنے کا فیصلہ کیا عمران خان کو بچانے والا کوئی نہیں ہوگا، ہم کسی سے انتقال نہیں لینا چاہتے، دوسروں کو چور چور کہنے والا پاکستان کی تاریخ کا سب سے بڑا چور اور ڈاکو نکلا ، ملک میں میں آگ لگا کر اپنی جیبیں بھر کر زمان پارک کے بنکر میں بیٹھا ہے۔
