اسلام آباد(وقائع نگار خصوصی)صدر مملکت ڈاکٹر عارف علوی نے پنجاب اور خیبرپختونخوا میں انتخابات کی تاریخ دے دی۔
”پاکستان ٹائم “ کے مطابق ایوان صدر کی جانب سے جاری اعلامیے میں کہا گیا ہے کہ صدر مملکت نے الیکشن ایکٹ 2017 ء کے سیکشن 57 ایک کے تحت 9 اپریل بروز اتوار پنجاب اور خیبر پختونخوا کی صوبائی اسمبلیوں کے لئے انتخابات کا اعلان کیا۔صدر مملکت نے کہا کہ الیکشن کمیشن ایکٹ کے سیکشن 57 دو کے تحت الیکشن کا پروگرام جاری کرے،آئین کے تحت آئین کے تحفظ اور دفاع کا حلف لیا،چونکہ کسی بھی عدالتی فورم کی جانب سے کوئی حکم امتناع نہیں،لہٰذا سیکشن 57 ایک کے تحت صدر کے اختیار کے استعمال میں کوئی رکاوٹ نہیں،آئین اور قانون 90 دن سے زائد کی تاخیر کی اجازت نہیں دیتا،آئین کی خلاف ورزی سے بچنے کے لئے انتخابات کی تاریخ کا اعلان کرنے کا اپنا آئینی اور قانونی فرض ادا کرنا ضروری سمجھتا ہوں۔صدر مملکت نے کہا کہ پنجاب اور خیبرپختونخوا کے گورنر صوبائی اسمبلیوں کی تحلیل کے بعد 90 دن کے اندر الیکشن کی تاریخ مقرر کرنے کی اپنی آئینی ذمہ داریاں ادا نہیں کر رہے جب کہ الیکشن کمیشن بھی دونوں اسمبلیوں کے انتخابات کرانے کی اپنی آئینی ذمہ داری پوری نہیں کر رہا،دونوں آئینی دفاتر اردو کی پرانی مثل ”پہلے آپ نہیں، پہلے آپ“ کی طرح گیند ایک دوسرے کے کورٹ میں ڈال رہے ہیں،اس طرزِ عمل سے تاخیر اور آئینی شقوں کی خلاف ورزی کا سنگین خطرہ پیدا ہو رہا ہے،الیکشن کمیشن پہلے ہی آئینی عہدیداروں کے نام اپنے مختلف خطوط میں انتخابات کی ممکنہ تاریخوں کا اشارہ دے چکا ہے۔
انہوں نے کہا کہ ان خطوط میں 90 دن کے اندر انتخابات کرانے کی الیکشن کمیشن کی ذمہ داری ظاہر ہوتی ہے، اسمبلیوں کے عام انتخابات کی تاریخ کے اعلان کے لئے الیکشن کمیشن سے مشاورت کا سنجیدہ عمل شروع کیا تاہم الیکشن کمیشن نے اس موضوع پر ہونے والے اجلاس میں شرکت سے معذرت کی،لہٰذا سیکشن 57 (1) کے تحت حاصل اختیارات کو بروئے کار لاتے ہوئے صوبائی اسمبلیوں کے عام انتخابات کے لیے 9 اپریل 2023 ء کی تاریخ کا اعلان کر رہا ہوں۔
واضح رہے کہ صدر مملکت ڈاکٹر عارف علوی اور چیف الیکشن کمشنر کمشنرسکندر سلطان راجہ کی ملاقات کا وقت آج صبح 11 بجے مقرر تھا۔ملاقات کے لیے چیف الیکشن کمشنر کا نام ایوان صدر کے داخلی گیٹ پر بھی لکھوایا گیا تھا۔صدر مملکت ڈاکٹر عارف علوی ایک گھنٹے تک اپنے دفتر میں چیف الیکشن کمشنر کی راہ تکتے رہے مگر چیف الیکشن کمشنرسکندر سلطان راجہ نہ آئے۔صدر مملکت نے ایوان صدر میں چیف الیکشن کمشنر کا ایک گھنٹے تک انتظار کیا، ملاقات کا وقت ختم ہونے کے بعد داکٹر عارف علوی نے اپنے دیگر معمول کے کام شروع کردیئے۔صدر مملکت نے پنجاب اور خیبر پختونخوا اسمبلی میں انتخابات کی تاریخ کے لیے چیف الیکشن کمشنر کو ملاقات کی دعوت دی تھی۔ صدر مملکت چیف الیکشن کمشنر کے نہ آنے پر قانونی ماہرین سے مشاورت کرنے کے بعدپنجاب اور خیبرپختونخوا میں انتخابات کی تاریخ دے دی۔دونوں صوبوں میں انتخابات 9 اپریل کو کرائے جائیں گے۔
