اسلام آباد(سٹاف رپورٹر)صدر مملکت ڈاکٹر عارف علوی کی جانب سے پنجاب اور خیبرپختونخوا اسمبلیوں کے انتخابات کی تاریخ کے اعلان کے بعد الیکشن کمیشن نے اہم اجلاس طلب کر لیا۔
”پاکستان ٹائم “ کے مطابق الیکشن کمیشن آف پاکستان صدر مملکت کی جانب سے پنجاب اور خیبرپختونخوا میں انتخابات کی تاریخ دینے کے بعد متحرک ہو گیا ہے،الیکشن کمیشن منگل کے روز 21 فروری کو طلب کئے گئے اجلاس میں صدر مملکت ڈاکٹر عارف علوی کی جانب سے اعلان کردہ تاریخ سے متعلق جائزہ لیا جائے گا۔ترجمان کے مطابق الیکشن کمیشن صدر مملکت کی جانب سے خط ملنے کے بعد قانون کے مطابق فیصلہ کرے گا۔
واضح رہے کہ صدر مملکت ڈاکٹر عارف علوی نے الیکشن ایکٹ 2017 ءکے سیکشن 57 ایک کے تحت 9 اپریل بروز اتوار پنجاب اور خیبر پختونخواہ کی صوبائی اسمبلیوں کے لئے انتخابات کا اعلان کرتے ہوئے کہا کہ الیکشن کمیشن ایکٹ کے سیکشن 57 دو کے تحت الیکشن کا پروگرام جاری کرے،آئین کے تحت آئین کے تحفظ اور دفاع کا حلف لیا چونکہ کسی بھی عدالتی فورم کی جانب سے کوئی حکم امتناع نہیں لہٰذا سیکشن 57 ایک کے تحت صدر کے اختیار کے استعمال میں کوئی رکاوٹ نہیں،آئین اور قانون 90 دن سے زائد کی تاخیر کی اجازت نہیں دیتا،آئین کی خلاف ورزی سے بچنے کے لئے انتخابات کی تاریخ کا اعلان کرنے کا اپنا آئینی اور قانونی فرض ادا کرنا ضروری سمجھتا ہوں۔
