اسلام آباد(بیورو رپورٹ )(پاکستان کے اعلی سطح وفد نے افغانستان کا دورہ کیا جس کی قیادت وزیردفاع خواجہ آصف نے کی۔ گزشتہ روز ترجمان دفترخارجہ کے مطابق وفد نے نائب وزیراعظم ملاعبدالغنی برادراخوند سے ملاقات کی جبکہ وفد نے وزیردفاع مولوی محمد یعقوب مجاہد اور وزیرداخلہ سراج الدین حقانی سے بھی ملاقاتیں کیں۔
ترجمان کے مطابق اعلی سطح وفد نے وزیر خارجہ امیر خان متقی سے بھی ملاقات کی۔ ان ملاقاتوں میں خطے میں دہشت گردی کے بڑھتے خطرے سے متعلق معاملات زیر بحث آئے، بالخصوص ٹی ٹی پی، آئی ایس کے پی کی دہشتگردی خطرات زیر بحث آئے۔ ترجمان کے مطابق دونوں فریقوں نے دہشت گردی کے خطرے سے موثر طریقے سے نمٹنے میں تعاون پر اتفاق کیا اور برادرانہ تعلقات کے مزید فروغ کیلئے مختلف شعبوں میں دوطرفہ تعاون مضبوط بنانے پر بھی اتفاق کیا۔ پاکستانی وفد نے افغان حکومت کے ذمہ داران کو کالعدم تحریک طالبان پاکستان (ٹی ٹی پی) کو ان کارروائیوں سے روکنے کی موثر حکمت عملی بنانے پر زور دیا۔ وفد نے موقف اختیار کیا کہ پاکستان کے پاس کالعدم ٹی ٹی پی کے سربراہان کی افغانستان میں موجودگی کے ٹھوس ثبوت موجود ہیں جبکہ کالعدم ٹی ٹی پی کی افغانستان میں موجودگی کی حقیقت سے طالبان حکومت کنارہ کشی کر رہی ہے۔
