افغانستان میں کالعدم ٹی ٹی پی پر حملہ،6 دہشت گرد جہنم واصل

کابل(خصوصی رپورٹ)صوبہ خوست میں کالعدم ٹی ٹی پی پر حملے میں اہم کمانڈروں سمیت 6 دہشت گرد ہلاک اور 15 زخمی ہوگئے۔
غیر ملکی خبررساں ادارے کے مطابق افغانستان صوبے خوست میں کالعدم تحریک طالبان پاکستان(ٹی ٹی پی ) پر آئی ای ڈی حملہ کیا گیا ہے،جس میں ٹی ٹی پی کے اہم کمانڈروں سمیت 6 دہشت گرد ہلاک اور 15 شدید زخمی ہوگئے۔ہلاک دہشت گردوں میں عبدالمنان،عالم خان،کجیر اور 3 نامعلوم شامل ہیں،جب کہ زخمی دہشت گردوں میں فضل امین، محمد عرف طوفان،نور پایو خان،فقیر اللہ،تروزئی،سَت کئی،علی سر خان،زبیر،ہجرت اللہ،کمال،شیر افضل،میں بخت اللہ،ذبیح اللہ اور 2 نامعلوم دہشت گرد شامل ہیں۔دھماکے کے بعد ٹی ٹی پی کی لیڈر شپ میں شدید مایوسی اور اختلافات کی لہر دوڑ گئی ہے،کالعدم ٹی ٹی پی کے حلقوں میں یہ بات ہو رہی ہے کہ پاکستان کا وفد جو افغانستان آیا تھا اس کے بعد سے ٹی ٹی پی کے لئے مسائل میں اضافہ ہوا ہے۔

دوسری جانب ٹی ٹی پی کے نچلے درجے کے دہشت گردوں کے درمیان ٹی ٹی اے کی سینئر لیڈر شپ کے متعلق شکوک و شبہات مزید بڑھ گئے ہیں اور یہ واقعات ٹی ٹی پی کے اندر بڑھتی ہوئی بے چینی اور اختلاف کا ایک واضح نشان ہے۔ذرائع کے مطابق ایک علیحدہ واقعے میں کالعدم ٹی ٹی پی کے عمر میڈیا گروپ کا انچارج مکرم خراسانی بھی شدید زخمی ہوا ہے۔

اس خبر پر اپنی رائے کا اظہار کریں

اپنا تبصرہ بھیجیں