کراچی(کامرس رپورٹر)پاکستان میں سونے کی قیمت تاریخ کی بلند ترین سطح پر پہنچ گئی۔
”پاکستان ٹائم “ کے مطابق بین الاقوامی مارکیٹ میں سونے میں ایک ڈالر کی کمی جب کہ پاکستان میں سونے کی فی تولہ قیمت میں 9 ہزار 400 روپے کا ہوشربا اضافہ ہوگیا۔عالمی مارکیٹ میں سونے کی فی اونس قیمت میں ایک ڈالر کی کمی ہوئی اور فی اونس سونے کی قیمت 1836 ڈالر کی سطح پر آگئی۔دوسری جانب پاکستان میں جمعرات کے روز سونے کی فی تولہ اور دس گرام قیمت میں بالترتیب 9 ہزار 400 روپے اور 8 ہزار 58 روپے کا غیر معمولی اضافہ ہوگیا۔قیمتوں میں اضافے کے نتیجے میں کراچی،حیدرآباد،ملتان،لاہور،راولپنڈی،اسلام آباد،کوئٹہ اور پشاور کی صرافہ مارکیٹوں میں سونے کی فی تولہ قیمت بڑھ کر 2 لاکھ 6 ہزار 500 روپے ہوگئی،جب کہ دس گرام سونے کی قیمت اضافے کے بعد ایک لاکھ 77 ہزار 40 روپے کی سطح پر پہنچ گئی۔سندھ صرافہ بازار ایسوسی ایشن کے مطابق سونے کی فی تولہ قیمت 9 ہزار400 روپے کے اضافے سے 2 لاکھ 6 ہزار500 روپے ہو گئی۔جب کہ 10 گرام سونے کی قیمت 8ہزار 58 روپے کے اضافے سے ایک لاکھ 77 ہزار40 روپے ہو گئی ہے۔دوسری جانب سٹیٹ بینک نے مانیٹری پالیسی کا اعلان کر دیا ہے۔مرکزی بینک نے شرح سود میں 3 فیصد اضافہ کیا ہے۔سٹیٹ بینک نے شرح سود 17فیصد سے بڑھا کر 20 فیصد کر دی ہے۔
