اسلام آباد(وقائع نگار خصوصی)وزیر خزانہ سینیٹر اسحاق ڈار کا کہنا ہے کہ پاکستان کے ڈیفالٹ ہونے سے متعلق افواہیں سراسر غلط ہیں جبکہ سٹیٹ بینک کے زرمبادلہ کے ذخائر بھی بڑھ رہے ہیں۔
”پاکستان ٹائم “ کے مطابق مائیکرو بلاگنگ ویب سائٹ پر ٹویٹ کرتے ہوئے وفاقی وزیرخزانہ اسحاق ڈار کا کہنا تھا کہ پاکستان مخالف لوگ ملک کے ڈیفالٹ ہونے سے متعلق افواہیں پھیلا رہے ہیں،پاکستان کے ڈیفالٹ ہونے کی افواہیں سرا سر غلط ہیں۔وزیر خزانہ کا کہنا تھا کہ سٹیٹ بینک کے زرمبادلہ کے ذخائر بڑھ رہے ہیں اور زرمبادلہ کے ذخائر 4 ہفتے پہلے کے مقابلے میں ایک بلین ڈالر زیادہ ہیں،جب کہ غیر ملکی کمرشل بینکوں نے سہولیات فراہم کرنا شروع کر دی ہیں۔سینیٹر اسحاق ڈار نے مزید کہا کہ عالمی مالیاتی ادارے( آئی ایم ایف) کے ساتھ ہمارے مذاکرات مکمل ہونے والے ہیں،امید ہے اگلے ہفتے تک آئی ایم ایف کے ساتھ سٹاف لیول معاہدے پر دستخط ہو جائیں گے،تمام اقتصادی اشاریے آہستہ آہستہ درست سمت میں بڑھ رہے ہیں۔
