گوجرانوالہ(وقائع نگار خصوصی)پاکستان مسلم لیگ ن کی سینئر نائب صدر مریم نواز نے کہا ہے کہ عمران خان کو پتہ ہے کہ وہ ختم شد،اس کی تمام شازشیں ناکام ہوگئیں،نواز شریف کی بیٹی قوم کے سامنے کھڑی ہے،تمہاری بیٹی کہاں ہے؟جو اپنی بیٹی کو تسلیم نہیں کرتا وہ عوام کا خیال کیا رکھے گا؟مریم نواز شیشہ دکھاتی ہے تو توہین عدالت ہوجاتی ہے،عمران خان اپنے انجام کو پہنچ گیا،اس کے سہولت کاروں کو کہتی ہوں کہ تم کیوں اپنی نوکریوں کے پیچھے پڑے ہو؟۔
گوجرانوالہ میں ن لیگ کے تنظیمی کنونشن سے خطاب کرتے ہوئے مریم نواز کا کہنا تھا کہ 2018 میں الیکشن آر ٹی ایس بٹھا کر چوری کیا گیا تھا لیکن اس وقت بھی سب سے بڑے فتنے،فراڈ،نو سر باز،گھڑی چور کو گوجرانوالہ نے پہچان لیا تھا اور 2018 میں گوجرانوالہ نے مسلم لیگ ن کو جتوایا تھا،جو کہتے ہیں نوجوان ن لیگ کے ساتھ نہیں وہ اس کنونشن کو دیکھ لیں،گوجرانوالہ والو کیا بات ہے،آج تم ٹرک بھر کر لے آئے ہو،فواد چوہدری کی آڈیو سنی ہے؟عدالت کے آگے ٹرک کھڑا کردیا تھا،اب یہ نہ کہہ دینا ٹرک مریم نواز چلا رہی تھی،اب مجھے کچھ کہنے کی ضرورت نہیں،ٹرک چلتا دیکھ کر لوگ خود سمجھ جائیں گے۔مریم نواز شیشہ دکھاتی ہے تو توہین عدالت ہوجاتی ہے،نواز شریف کو اقامہ رکھنے اور بیٹے سے تنخواہ نہ لینے پر نکالا جاتا ہے،تم نے اپنی جائیداد اور بیٹی چھپائی،اسی جھوٹ کے ساتھ تم نے 4 الیکشن لڑے،نواز شریف کی بیٹی قوم کے سامنے کھڑی ہے،تمہاری بیٹی کہاں ہے؟جو اپنی بیٹی کو تسلیم نہیں کرتا وہ عوام کا خیال کیا رکھے گا؟
مریم نواز کا کہنا تھا کہ سابق وزیر اعظم نواز شریف کو ایک ویزے پر نکالا گیا،وہ اپنی بیوی کو بستر مرگ پر چھوڑ کر آیا اور عدالتوں میں کہا جاتا ہے کہ نواز شریف ایک گھنٹے میں پیش ہو جبکہ ان کو بلایا جاتا ہے تو یہ پلستر دکھا دیتے ہیں،یہ وہی لوگ ہیں جو نواز شریف کی بیوی کی بیماری کا مذاق اڑاتے تھے،نواز شریف کو وزارت عظمی سے نکالا گیا، پارٹی کی صدارت سے ہٹایا گیا اور تاحیات نااہل کردیا گیا،ان کی سرکاری دفتر نہ رکھنے والی بیٹی کو 10سال کی سزا سنا دی گئی،جب کہ ایک طرف 190 ملین پاونڈ اپنے دوست کی جیب میں ڈال دیئے گئے،گھڑیاں چوری کی گئیں،پیسے لے کر تقرر و تبادلے کرائے گئے،انہیں”ضمانت پارک“میں بیٹھے ہوئے ہی ضمانت مل جاتی ہے،جو لوگوں کو کہتا تھا ہم کوئی امریکا کے غلام ہیں،وہ ”ضمانت پارک“میں بیٹھ کر امریکیوں سے ملاقات کر رہا ہے،اس نے جھوٹے سائفر پر اپنی حکومت توڑی اور خود امریکیوں سے معافی مانگ کر پتلی گلی سے نکل گیا۔
مریم نواز شریف کا کہنا تھا کہ کل ”جیل بھرو تحریک“ بھی آہوں اور سسکیوں کے ساتھ اختتام کو پہنچی، وہی” جیل بھرو تحریک“ جو شروع ہی نہیں ہوئی تو معطل کیسے ہو گئی؟ تاریخ میں”جیل بھرو“کی بڑی کامیاب تحاریک ہوتی تھیں لیکن جب لیڈر”ضمانت پارک“میں بیٹھا ہو گا تو کارکن کیوں جیلیں بھریں گے؟اب کہتا ہے کہ ڈاکٹرز میں مجھے فٹ قرار دے دیا ہے،عدالت میں پیش ہونا تھا تو ٹانگ ٹوٹی تھی،جلسوں میں جانے کیلئے ٹھیک ہوگئی؟وہ جس اسمبلی سے اکڑ کر نکلا تھا،وہاں جانے کیلئے منتیں کرتا ہے،جو شخص ہوش وحواس میں نہ رہتا ہو،منشیات کا عادی ہو،کیا ایسے شخص کے ہاتھ میں 22 کروڑ افراد کی تقدیر دی جاسکتی ہے؟ایسے شخص کی درخواستیں نہیں سنتے پاگل خانے میں بھرتی کراتے ہیں۔
مریم نواز نے کہا کہ 70 سال کے قرضے 4 سال میں دگنے کرنے والا پوچھتا ہے ڈالر کیوں مہنگا ہوا؟آج کہتے ہیں پاکستان کیوں نیچے جارہا ہے؟پاکستان اس لئے نیچے جا رہا ہے کیونکہ نوازشریف کے ساتھ سازش کی گئی تھی،عمران خان کی سیاست کی کشتی گہرے پانی میں ڈوب چکی ہے،یہ شخص اپنے انجام کو پہنچ گیا،اس کے سہولت کاروں کو کہتی ہوں تم کیوں اپنی نوکریوں کے پیچھے پڑے ہو؟اس شخص نے پنجاب کے سب سے بڑے ڈاکو کو اپنی پارٹی کا سب سے بڑاعہدہ دے دیا۔مسلم لیگ ن انتخابات کیلئے تیار اور الیکشن کے میدان میں اترچکی ہے،چوہوں کی طرح گھر میں چھپ کر بیٹھنے والو اپنا انتخابی نشان ٹرک رکھ لو۔
