لاہور(کورٹ رپورٹر)لاہور ہائی کورٹ نے”جیل بھرو تحریک“ کے تحت نظر بند پاکستان تحریک انصاف( پی ٹی آئی) رہنماوں اور کارکنوں کو رہا کرنے کا حکم دے دیا۔
”پاکستان ٹائم “ کے مطابق لاہور ہائی کورٹ کے جسٹس طارق سلیم شیخ نے تحریک انصاف کے رہنما فواد چوہدری کی جانب سے جیل بھرو تحریک میں گرفتار رہنماوں اور کارکنوں کی رہائی کے لیے دائر درخواست پر سماعت کی۔دوران سماعت جسٹس طارق سلیم شیخ نے فواد چوہدری کے وکیل سے استفسار کیا کہ آپ بتائیں حراست میں غیر قانونی کیا ہے؟آپ نے خود جیل بھرو تحریک شروع کی،آپ کی درخواست قابل سماعت کیسے ہے؟۔فواد چوہدری کے وکیل سکندر ذوالقرنین نے کہا کہ یہ سب سیاسی قیدی ہیں،رولز میں سیاسی قیدیوں کے بارے میں واضح بتایا گیا ہے،احتجاج کے طور پر جیل بھرو تحریک شروع کی گئی اور رہنماوں نے اپنے آپ کو خود گرفتاری کے لیے پیش کیا۔اس موقع پر سرکاری وکیل نے کہا کہ پٹیشن کے ساتھ کوئی ایسا ثبوت نہیں کہ تحریک انصاف کے لوگ حراست میں ہیں،یہ لوگ اپنی مرضی سے حراست میں گئے تھے،میں متعلقہ اتھارٹیز سے ہدایات لے لیتا ہوں۔جسٹس طارق سلیم نے سرکاری وکیل سے کہا کہ آپ ہدایات لے لیں اور عدالت کو آگاہ کریں۔بعدازاں لاہور ہائی کورٹ نے نظر بندی کے احکامات معطل کرتے ہوئے شاہ محمود قریشی، اسدعمر سمیت و دیگر گرفتار رہنماوں اور کارکنوں کو رہا کرنے کا حکم دیدیا۔عدالت نے اس ضمن میں حکومت پنجاب پنجاب سمیت دیگر متعلقہ فریقین سے 7 مارچ کو جواب بھی طلب کرلیا ہے۔لاہور ہائیکورٹ کے جج جسٹس طارق سلیم شیخ نے یہ حکم پی ٹی آئی رہنما فواد چوہدری کی درخواست پر جاری کیا ہے۔یاد رہے کہ گزشتہ دنوں پی ٹی آئی رہنما شاہ محمود اور اسد عمر سمیت دیگر رہنماوں اور کارکنوں نے لاہور سے گرفتاری دینے کے بعد انہیں صوبے کی دوسری جیلوں میں منتقل کیا گیا تھا۔
