جدہ(مانیٹرنگ ڈیسک)حرمین ایکسپریس ٹرین انتظامیہ نے مکہ، مدینہ آنے جانے والے عمرہ زائرین کی سہولت کی خاطر رمضان المبارک میں ٹرینوں کی تعداد میں اضافے کا اعلان کیاہے۔
سعودی خبررساں ادارے کے مطابق حرمین ایکسپریس ٹرین انتظامیہ کی جانب سے جاری بیان میں کہا گیا ہے کہ رمضان المبارک کے دوران جدہ کے شاہ عبدالعزیز انٹرنیشنل ایئرپورٹ کے ٹرین سٹیشن سے مکہ مکرمہ میں مسجد الحرام اورمدینہ منورہ میں مسجد نبوی ﷺجانے والے زائرین کی تعداد بہت زیادہ ہوتی ہے،زائرین اپنی سہولت سے جتنی بار چاہیں عمرہ ادا کرسکتے ہیںزائرین کوٹرین سے آمد ورفت کی سہولت فراہم کرنے کےلیے ٹرینوں کی تعداد میں اضافہ کیا گیا ہے۔جدہ میں السلیمانیہ ریلوے سٹیشن سے مکہ کے لیے یومیہ ٹرینوں کی تعداد 58 کردی گئی ہے۔جدہ سے مکہ و مدینہ کےلیے 2ٹرینیں فی گھنٹہ کے حساب سے شیڈول ہیں جبکہ رش کے دنوں میں ان کی تعداد بڑھا دی جائے گی۔ واضح رہے کہ ماہ رمضان میں روزانہ مکہ سے براستہ جدہ ، مدینہ منورہ کےلیے ٹرینوں کی تعداد 100 سے زیادہ کردی گئی ہے۔
