اسلام آباد(سٹاف رپورٹر)پاکستان تحریک انصاف(پی ٹی آئی) کے مرکزی رہنما اور سابق وفاقی وزیر اطلاعات فواد چوہدری نے اسٹیبلشمنٹ کو حیران کن مشورہ دیتے ہوئے کہا ہے کہ پنجاب میں الیکشن کی تاریخ ملنا آئین کی فتح ہے، سیاسی جماعتیں اقتدار کا فیصلہ اب عوام کو کرنے دیں، اقتدار کا فیصلہ نامزدگیوں پرنہیں عوام کے ہاتھ میں ہونا چاہئے، اسٹیبلشمنٹ اپنی پالیسی پرنظرثانی کرتے ہوئے عوام پر اعتبار کرے۔
”پاکستان ٹائم“ کے مطابق میڈیا سے گفتگو کرتے ہوئے فواد چوہدری کا کہنا تھا کہ ہر آنے والے دن کے ساتھ حکومت کے دن پورے ہورہے ہیں، حکومت اس قابل نہیں رہی کہ حیلے بہانے کر سکے، حکومت نہیں اسٹیبلشمنٹ کی سوچ کی اہمیت ہے، اسٹیبلشمنٹ اپنی پالیسی پر نظرثانی کرتے ہوئے عوام پر اعتبار کرے، ہمارا اس وقت اسٹیبلشمنٹ سے کوئی رابطہ نہیں۔فواد چوہدری نے کہا کہ حکومت سیاسی جماعتوں اور اسٹیبلشمنٹ کو ساتھ لے کر چلے، ہم الیکشن فریم ورک پر حکومت سے بات چیت کیلئے تیار ہیں، الیکشن فریم ورک کیلئے آئینی ترمیم کی ضرورت ہوگی، الیکشن کمیشن نے عدالتی حکم پر عملدرآمد شروع کردیا ہے، کل سے انتخابی مہم کا آغاز ہورہا ہے، نگران حکومت اپنا سامان سنبھالنا شروع کرے، ان کے تمام عزائم کی تکمیل نہیں ہو سکی، تحریک انصاف پنجاب میں دو تہائی اکثریت سے حکومت بنائے گی۔
