لاہور(سٹاف رپورٹر)پاکستان تحریک انصاف(پی ٹی آئی) نے الیکشن کی تیاریاں شروع کرتے ہوئے پارٹی چیئرمین عمران خان کی جانب سے پنجاب اسمبلی کے الیکشن کے لئے امیدوار کے نام فائنل کرنے کی تردید کردی۔
”پاکستان ٹائم “ کے مطابق پی ٹی آئی کی رہنما مسرت جمشید چیمہ نے مائیکرو بلاگنگ ویب سائٹ پر اپنے ایک ٹویٹ میں لکھا کہ میڈیا و سوشل میڈیا پر پارٹی ٹکٹس کے حوالے سے جو خبریں اور لسٹیں چل رہی ہیں وہ حقیقت پر مبنی نہیں، جب بھی ٹکٹس فائنل ہوں گی تو پارٹی چیئرمین عمران خان خود اس کا اعلان کریں گے، پارٹی میں ٹکٹس کے حوالے سے مشاورت چل رہی ہے اور کسی بھی امیدوار یا ممبر کو ابھی تک کنفرمیشن نہیں دی گئی۔دوسری جانب سابق وزیراعلیٰ پنجاب اور پی ٹی آئی رہنما چوہدری پرویز الٰہی نے ٹوئٹر پر جاری اپنے بیان میں کہا کہ عمران خان نے الیکشن مہم کا آغاز کردیا، اب وہ وقت دور نہیں جب وہ وزیراعظم ہوں گے، ملکی معیشت کا بیڑہ غرق شہباز شریف ٹولے نے کیا اور الزام عمران خان پر لگا رہے ہیں، یہ عوام کے غضب سے نہیں بچ سکتے، مریم نواز عدلیہ اور اداروں پر تنقید کر کے کیا حاصل کرنا چاہتی ہیں۔سابق وزیراعلیٰ نے کارکنان کو الیکشن کی تیاری کی ہدایت دیتے ہوئے کہا کہ پنجاب میں الیکشن کی تاریخ آ چکی، کارکن تیاری شروع کر دیں، موجودہ مسائل کا واحد حل انتخابات ہی ہیں، نگران حکومت اپنے اختیارات سے تجاوز کر رہی ہے، مشکل معاشی حالات میں ملک ڈوبا ہوا ہے اور پی ڈی ایم ٹولے کے غیر ملکی دورے ختم نہیں ہو رہے۔واضح رہے کہ پنجاب میں پی ٹی آئی کی ٹکٹوں کی تقسیم کے لئے خبر سامنے آئی تھی کہ چیئرمین پی ٹی آئی عمران خان نے لاہور سے پارٹی امیدواروں کو فائنل کرتے ہوئے حماد اظہر کو پنجاب کے میدان میں اتارنے کا فیصلہ کیا ہے۔
