کراچی(سٹاف رپورٹر)پاکستان پیپلزپارٹی کے چیئرمین اور وزیر خارجہ بلاول بھٹو زرداری نے سیلاب متاثرین کی مدد اور ڈیجیٹل مردم شماری پر تحفظات کا اظہار کرتے ہوئے دھمکی دی ہے کہ سیلاب متاثرین کی مدد کا وعدہ پورا نہ کیا تو وزارت رکھنا مشکل ہوگا۔
”پاکستان ٹائم “ کے مطابق پاکستان ڈیموکریٹک موومنٹ(پی ڈی ایم)حکومت کی اہم اتحادی جماعت پیپلز پارٹی کے سربراہ اور وزیر خارجہ بلاول بھٹو زرداری نے سیلاب متاثرین کی مدد اور ڈیجیٹل مردم شماری کے حوالے سے سندھ حکومت کے تحفظات کا اظہار کرتے ہوئے وزیر اعظم شہباز شریف کو دھمکی دی ہے کہ سیلاب متاثرین کے لئے وفاقی حکومت کی مدد ابھی تک نہیں ملی،وفاقی حکومت سیلاب متاثرین کو ترجیح دے،وزیر اعظم شہباز شریف سیلاب متاثرین کی مدد کیلئے کیا وعدہ نبھائیں،اگر وعدہ پورا نہ کیا تو ہمارے لئے وزارت رکھنا مشکل ہوگا۔کراچی میں سیلاب سے متاثرہ کسانوں میں رقوم کی تقسیم کے حوالے سے تقریب سے خطاب میں بلاول بھٹو زرداری کا کہنا تھا کہ موجودہ ڈیجیٹل مردم شماری ہماری شکایات کا ازالہ نہیں،ڈیجیٹل مردم شماری پر وفاقی حکومت کو شکایات بھیجی ہیں،اس طرح کی ناقص ڈیجیٹل مردم شماری ہمیں قبول نہیں،تحفظات دور نہ کیے گئے تو سندھ اس معاملے میں وفاقی حکومت کا ساتھ نہیں دے گا،سندھ کے عوام پر ڈاکہ مارنے کی اجازت نہیں دیں گے۔بلاول بھٹو نے کہا کہ سیاسی چوہا زمان پارک میں کسی بستر کے نیچے چھپا ہوا ہے،یہ چوہا گرفتاری سے بچنے کیلئے چھپا ہوا ہے،میڈیا یہی دکھا رہا ہے کہ چوہے کی ٹانگ میں درد ہے،چوہا ادھر سے ادھر بھاگا ہے،میڈیا کو چاہیے کہ سیاسی چوہے کے بجائے عوام کے مسائل کی کوریج پر فوکس کرے۔
