لاہور(کورٹ رپورٹر)لاہور ہائی کورٹ نے پاکستان مسلم لیگ ن کی مرکزی سینئر نائب صدر مریم نواز شریف کو بڑی خوشخبری سنا دی ہے۔
”پاکستان ٹائم “ کے مطابق لاہور ہائی کورٹ نے مسلم لیگ ن کی چیف آرگنائزر اور سینئر نائب صدر مریم نواز اور وفاقی وزیر قانون اعظم نذیر تارڑ کے خلاف توہین عدالت کی کارروائی کے لیے دائر درخواست ناقابل سماعت قرار دے کر مسترد کر دی،لاہور ہائی کورٹ میں مریم نواز شریف اور وفاقی وزیر قانون اعظم نذیر تارڑ کے خلاف ایڈووکیٹ
شاہد رانا کی توہین عدالت کی کارروائی کے لیے دائر درخواست پر جسٹس شجاعت علی خان نے سماعت کی۔ایڈووکیٹ شاہد رانا نے عدالت میں موقف اپنایا کہ کوئی بھی معاملہ ہو،میں اسے سنجیدہ لیتا ہوں،مریم نواز نے سرگودھا میں تقریر کی اور یہ معاملہ اس عدالت کے دائرہ اختیار میں آتا ہے،مریم نواز نے چھ مواقع پر توہین عدالت کی ہے،یہ درخواست میں نے اپنی مشہوری کے لیے دائر نہیں کی،مجھے مشہوری کی ضرورت بھی نہیں ہے،ہمیں توہین عدالت کے قانون پر عملدرآمد کروانا ہو گا،پاکستان کوئی بنانا ری پبلک نہیں ہے،مدعا علیہ نے سرگودھا میں حالیہ جلسہ عام کے دوران اپنی تقریر میں عدالت عظمیٰ کے ججز کے خلاف ’توہین آمیز‘ الفاظ استعمال کیے تھے،تمام ٹیلی ویژن چینلز اور پرنٹ میڈیا نے مدعا علیہ کی تقریر نشر کی،مریم نواز نے آئین کے آرٹیکل 204 (2) (بی) اور توہین عدالت آرڈیننس 2003 کے آرٹیکل 2 (سی) کے تحت عدالت کی توہین کی ہے،مدعا علیہ جج یا عدالت کی مبینہ بدانتظامی کا پرچار نہیں کر سکتیں لیکن آئین کے آرٹیکل 209 کے تحت ریفرنس دائر کر کے صدر یا سپریم جوڈیشل کونسل کو مطلع کر سکتی ہیں، عدالت عدالیہ مریم نواز کو توہین عدالت کا شوکاز نوٹس جاری کرے۔
لاہور ہائی کورٹ نے درخواست گزار کے وکیل کے دلائل سننے کے بعد مریم نواز،اعظم نذیر تارڑ سمیت دیگر رہنماوں کے خلاف توہین عدالت کی کارروائی کے لیے دائر درخواستوں پر فیصلہ محفوظ کرلیا۔بعد ازاں محفوظ فیصلہ سناتے ہوئے لاہور ہائی کورٹ نے درخواست ناقابل سماعت قرار دے کر مسترد کردی۔
