اسلام آباد(وقائع نگار خصوصی)وفاقی وزیر اطلاعات اور پاکستان مسلم لیگ ن کی مرکزی رہنما مریم اورنگزیب نے پاکستان تحریک انصاف(پی ٹی آئی)کے سربراہ پر کڑی تنقید کرتے ہوئے کہا ہے کہ عمران خان نے پاکستان کے آئین اور قانون کو یرغمال بنا رکھا ہے،اسے معلوم ہے کہ وہ عدلیہ پر حملہ آور ہو گا تو اسے ضمانت مل جائے گی۔
”پاکستان ٹائم “ کے مطابق مریم اورنگزیب کا کہنا تھا کہ جس دن یہ شخص پیش ہوگا پکڑا جائے گا،عمران خان کارکنوں کو ڈھال بنا کر بچ جاتاہے،گھڑی چور جب پولیس کو دیکھتاہے تو بھاگ جاتا ہے اور پولیس کے جاتے ہی بڑھکیں مارنا شروع کردیتاہے،عمران خان تم نے چوری نہیں کی توبھاگ کیوں رہے ہو عدالت میں پیش ہو؟اس شخص نے پاکستان کے قانون اورآئین کویرغمال بنارکھاہے،اسے معلوم ہے کہ یہ عدلیہ پر حملہ آور ہو گا تو اسے ضمانت مل جائے گی۔
مریم اورنگزیب نے کہا کہ اس شخص نے پاکستان کے عوام کو لوٹا ہے،مہنگائی کی چکی میں پیسا ہے،یہ شخص جانتا ہے کہ جس دن یہ عدالت میں پیش ہو گیا تو یہ پکڑا جائے گا،اسے جب پولیس پکڑنے آتی ہے تو یہ چیخیں مارنے لگتا ہے اور بل میں گھس جاتا ہے،یہ خود کو بچانے کے لئے عورتوں اور بچوں کو ڈھال بنا لیتا ہے،پورے کا پورا نظام اس کے ہاتھوں مجبور ہے،عمران خان کو کوئی گرفتار نہیں کر سکتا اور عدالت اسے بلا نہیں سکتی،اگر اس نے جرم نہیں کیا تو عدالت میں پیش ہو۔
