کراچی(کامرس رپورٹر) موٹر سائیکل بنانے والے اداروں ہنڈا، یاماہا اور روڈ پرنس کے بعد یونائیٹڈ آٹو انڈسٹری نے بھی اپنی تمام موٹر سائیکلوں کی قیمتوں میں ہوشربااضافہ کردیا ہے۔
”پاکستان ٹائم “ کے مطابق موٹر سائیکلیں بنانے والی معروف کمپنی یونائیٹڈ آٹو انڈسٹری نے اپنی حریف کمپنیوں کے نقش قدم پر چلتے ہوئے موٹر بائیکس کی قیمتوں میں بڑا اضافہ کرنے کا اعلان کردیا ہے ۔یونائیٹڈ کی یو ایس 70 کی نئی قیمت ایک لاکھ دو ہزار 500 روپے ہوگئی ہے جب کہ پرانی قیمت 96 ہزار 500 روپے تھی۔اسی طرح یونائیٹڈ یو ایس 100 کی نئی قیمت ایک لاکھ 8 ہزار روپے ہوئی ہے جب کہ پرانی قیمت 96 ہزار 500 روپے تھی۔یونائیٹڈ آٹو انڈسٹری نے اپنی تیار کردہ سکوٹی کی قیمت میں 15 ہزار روپے کا اضافہ کیا ہے جس کے بعد اس کی نئی قیمت ایک لاکھ 35 ہزار روپے ہو گئی ہے جب کہ پہلے اس کی قیمت ایک لاکھ 20 ہزار روپے تھی۔ یونائیٹڈ یو ایس 125 کی قیمت میں بھی 9 ہزار روپے کا اضافہ کیا گیا ہے جس کے بعد موٹر سائیکل کی قیمت بڑھ کر ایک لاکھ 50 ہزار روپے ہو گئی ہے جب کہ اس سے قبل قیمت ایک لاکھ 41 ہزار روپے تھی۔یونائیٹڈ آٹو انڈسٹری نے اپنی تیار کردہ یونائیٹڈ 150 الٹی میٹ تھرل کی قیمت میں کوئی اضافہ نہیں کیا ہے۔یاد رہے کہ اس سے قبل ہنڈا نے اپنی تیار کردہ موٹر بائیکس کی قیمتوں میں 25ہزار تک کا اضافہ کیا تھا جبکہ یاماہا اور روڈ پرنس کمپنی نے بھی اپنی تیار کردہ موٹر بائیکس کی قیمتوں میں بالترتیب 3500سے 30ہزار تک کا اضافہ کیا تھا ۔
