لاہور(سٹاف رپورٹر)سابق وزیراعلیٰ پنجاب اور حال ہی میں پاکستان تحریک انصاف ( پی ٹی آئی ) میں شمولیت اختیار کرنے والے چوہدری پرویز الٰہی کو پی ٹی آئی کا مرکزی صدر مقررکردیا گیا ہے۔
”پاکستان ٹائم “ کے مطابق سابق وزیراعلیٰ پنجاب پرویز الٰہی کو چیئرمین تحریک انصاف عمران خان کا مشکل وقت میں ساتھ دینے کا انعام مل گیا،چوہدری پرویز الٰہی کو پاکستان تحریک انصاف کا صدر مقرر کردیا گیا ہے، چیئرمین پی ٹی آئی عمران خان کی باضابطہ منظوری سے نوٹیفکیشن جاری کردیا گیا ہے۔تحریک انصاف کے رہنما فواد چوہدری نے پرویزالہیٰ سے ان کی رہائشگاہ پرملاقات کرکے انھیں پارٹی صدر بنائے جانے والے نوٹیفکیشن کی کاپی پیش کی۔تحریک انصاف کا صدر مقرر کیے جانے پر چوہدری پرویزالٰہی نے عمران خان سے اظہار تشکر کرتے ہوئے کہا کہ عمران خان نے ان پر جو اعتماد کیا وہ اس کیلئے شکر گزار ہیں، عمران خان ملک میں آئین، قانون اورعام آدمی کی جنگ لڑرہے ہیں، آئین اور قانون کی سربلندی کی جدوجہد جاری رکھیں گے۔یاد رہے کہ چوہدری پرویز الٰہی پاکستان مسلم لیگ ق کی جانب سے پنجاب کے وزیراعلیٰ رہے، پارٹی سربراہ چوہدری شجاعت سے اختلافات کی وجہ سے پرویز الٰہی نے تحریک انصاف میں شمولیت کا فیصلہ کیا تو چوہدری شجاعت حسین نے انہیںمسلم لیگ ق سے نکال دیااور پارٹی رکنیت ختم کرکے انہیں ق لیگ کے عہدے سے برخاست کردیا تھا۔چوہدری پرویز الٰہی 21 فروری 2023 کوفواد چوہدری کے ہمراہ پریس کانفرنس میں پاکستان تحریک انصاف میں شمولیت کا باقاعدہ اعلان کیا تھا۔
