لاہور(سٹاف رپورٹر)پاکستان تحریک انصاف(پی ٹی آئی) رہنما اور سابق وفاقی وزیرمیاںحماد اظہرنے کہا ہے کہ پاکستان کا اصلی شیر آج(بدھ کو) زمان پارک سے نکلے گا، عمران خان کو وہ تاریخی استقبال دیں جو آج تک کسی کو نہیں ملا۔
”پاکستان ٹائم “ کے مطابق لاہور میں میڈیا سے گفتگو کرتے ہوئے حماد اظہر نے کہا کہ بدھ کی ریلی کیلئے انتظامات مکمل کر لیے گئے ہیں، ایک بجے زمان پارک سے نکلیں گے، 25 مقامات پر استقبالیہ کیمپ ہوں گے، عمران خان آج (بدھ کو )ایک سیاسی تقریب اور شو کیلئے نکل رہے ہیں، ہماری جدوجہد جمہوریت، عدلیہ کی آزادی اور قانون کی بالادستی کیلئے ہے، عمران خان پر اس وقت 77 جعلی مقدمے کیے گئے ہیں، عدالتوں میں عمران خان کیلئے کوئی سیکیورٹی موجود نہیں، مریم نواز یونین کونسل کا الیکشن نہیں لڑیں، انہیں 18 گاڑیاں دی گئی ہیں، ہماری سیکیورٹی رضا کارانہ طور پر موجود ہے، ہمیں خطرہ ان سے ہے جنہوں نے حفاظت کرنی ہے۔انہوں نے کہا کہ بڑے چور 1100 ارب روپے این آر او میں کھا جاتے ہیں، لوگوں پر جیسے پرچے کیے جا رہے ہیں اس کو بنانا رپبلک بنانا چاہتے ہیں، الیکشن کا نام سن کر رانا ثناء اللہ اور فضل الرحمان کی ٹانگیں کانپ جاتی ہیں، الیکشن قانون کے مطابق 90 روز کے اندر اندر ہونا ہے۔سابق وزیر خزانہ کا کہنا تھا کہ دور دور تک آئی ایم ایف کا پروگرام نظر نہیں آ رہا، جون کے بعد یہ آئی ایم ایف کا پروگرام ختم ہو رہا ہے، ’ڈار نومکس‘ کی بجائے اکانومکسں کی بات کریں تو ملک ٹھیک ہوگا۔انہوں نے کہا کہ مسلم لیگ (ن) عدلیہ پر حملہ آور ہونے کیلئے ایک منظم مہم چلا رہی ہے، عدلیہ کو تقسیم کرنے کی کوشش کی جا رہی ہے، ہمیں عدلیہ سے بہت زیادہ امید ہے، جمہوریت اور آئین کا تحفظ عوام نے کرنا ہے، الیکشن کمشنر کی خواہشات جو بھی ہوں، الیکشن کا بگل بجے گا تو سب واضح ہو جائے گا۔
