اسلام آباد(وقائع نگار)لاہور میں تحریک انصاف کی ریلی پر پولیس تشدد کے بعد وفاقی دارالحکومت میں ”عورت مارچ“ کے شرکاء نے کوریج کرنے پر صحافیوں پر تشدد شروع کردیا،عورت مارچ کے منتظمین کے تشدد سے نجی ٹی وی کی رپورٹر سمیت کئی صحافی زخمی ہو گئے۔
”پاکستان ٹائم “ کے مطابق وفاقی دارالحکومت میں عورت مارچ کے منتظمین نے دھاوا بولتے ہوئے وہاں کوریج کے لئے آنے والے صحافیوں کو تشدد کا نشانہ بنا ڈالا۔عورت مارچ کے شرکا نے صحافیوں پر تشدد کیا جس کے نتیجے میں خاتون صحافی سمیت متعدد افراد زخمی ہوگئے۔عورت مارچ کے زیر اہتمام پریس کلب اسلام آباد کے سامنے مارچ کا انعقاد کیا گیا جس میں مختلف شعبوں سے تعلق رکھنے والی خواتین نے شرکت کی۔شرکاء نے خواتین کے حقوق کیلئے نعرے بازی بھی کی۔شرکا نے انتظامیہ کی جانب سے مقررہ کردہ رستے سے آگے نکل کر ڈی چوک جانے کی کوشش کی اور خواتین نے آگے آکر خاردار تاریں ہٹا دیں اور نعرے لگائے کہ سڑک پر احتجاج کرنا ہمارا بھی حق ہے۔ پولیس نے مظاہرین کو روکا اور پولیس حکام اور مظاہرین کے درمیان تلخ کلامی ہوئی۔مظاہرین نے اسلام آباد پولیس کے خلاف نعرے بازی شروع کردی۔اسی دوران عورت مارچ کے شرکا نے کوریج کرنے والے صحافیوں کو بھی تشدد کا نشانہ بنایا جس کے نتیجے میں نجی ٹی وی چینل کی خاتون صحافی اور کیمرہ مین زخمی ہوگئے۔ خواتین اور خواجہ سراوں نے کوریج کیلئے آئے میڈیا پر ہی حملہ کردیا۔صحافیوں نے عورت مارچ کا بائیکاٹ کردیا۔
