پشاور(وقائع نگار)الیکشن کمیشن آف پاکستان نے پنجاب میں انتخابی شیڈول کا اعلان تو کردیا ہے تاہم خیبرپختونخوا میں انتخابات کے حوالے سے کوئی فیصلہ سامنے نہیں آ سکا ،الیکشن کمیشن اور گورنر کے پی الیکشن کی تاریخ طے نہ کرسکے،مشاورت بے نتیجہ ختم ہو گئی تاہم گورنر خیبرپختونخوا حاجی غلام علی کا کہنا ہے کہ انتخابات کی تاریخ دیناعید کا چاند دیکھنے سے مشکل کام ہے، الیکشن کمیشن کےساتھ اجلاس میں پیش رفت ہوئی ہے، انتخابات کی تاریخ پر قوم جلد خوشخبری سنے گی۔
”پاکستان ٹائم “ کے مطابق پشاور میں الیکشن کمیشن نمائندوں اور گورنر خیبر پختونخوا کا الیکشن سے متعلق مشاورتی اجلاس بے نتیجہ ختم ہو گیا۔خیبرپختونخوا میں انتخابات تاریخ کے حوالے سے کوئی فیصلہ نہ ہوسکا۔گورنر نے چیف سیکریٹری اور آئی جی سے امن وامان صورتحال پر بریفنگ لینے کیلئے وقت مانگ لیا۔آج ہونے والے اجلاس میں الیکشن کمیشن کی نامزد کردہ ٹیم اور گورنر خیبرپختونخوا حاجی غلام علی کی صوبائی اسمبلی کے انتخابات سے متعلق تاریخ پر مشاورت بے نتیجہ ختم ہوئی۔اجلاس میں گورنر خیبرپختونخواہ نے صوبہ میں پر امن انتخابات کے انعقاد پر زور دیا، جبکہ الیکشن کمیشن حکام کا موقف اپنایا کہ سپریم کورٹ کے حکم کے تحت مشاورت کا دائرہ کار صرف انتخابی تاریخ پر ہوگاتاہم الیکشن کمیشن اور گورنر خیبرپختونخوا کے درمیان انتخابات کی تاریخ کے حوالے سے ڈیڈ لاک برقرار رہا۔گورنرخیبرپختونخوا اور الیکشن کمیشن ٹیم کے درمیان اگلی ملاقات اسلام آباد میں ہونے کا امکان ہے۔ گورنر کے پی حاجی غلام علی کی زیر صدارت اجلاس ہوا جس میں کے پی میں انتخابات کے انعقاد پر غور کیا گیا۔الیکشن کمیشن کی نامزد کردہ ٹیم میں سیکرٹری الیکشن کمیشن عمر حمید خان، سپیشل سیکرٹری الیکشن کمیشن ظفراقبال حسین اور ڈائریکٹرجنرل لاءارشد خان شامل تھے۔ الیکشن کمیشن حکام نے گورنر خیبرپختو نخوا کو بریفنگ بھی دی۔دوسری طرف پشاور میں میڈیا سے گفتگو کرتے ہوئے گورنر خیبرپختونخوا نے کہا کہ پیر یا منگل کو الیکشن کمیشن کے دفتر جاو¿ں گا، الیکشن کمیشن کے ساتھ میٹنگ میں کسی فیصلے پر پہنچ جائیں گے، خیبرپختونخوا میں انتخابات پنجاب سے زیادہ شفاف ہوں گے، یہاں امن وامان کی صورتحال پنجاب سے مختلف ہے، ایسا کوئی دن نہیں گزرا کہ یہاں کوئی حملہ نہ ہو، کوشش ہونی چاہیے کہ ایسا فیصلہ کریں جس سے عوام مشکل میں نہ پڑیں۔ترجمان گورنر ہاو¿س کے مطابق مشاورتی اجلاس میں عام انتخابات کیلئے تاریخ کے حوالے سے مشاورت آخری مراحل میں داخل ہوگئی اور گورنر خیبرپختونخوا آئندہ ہفتے الیکشن کمیشن اسلام آباد میں حتمی مشاورت کیلئے جائیں گے۔
