لاہور (مانیٹرنگ ڈیسک)پاکستان تحریک انصاف کے کارکن علی بلال کو مردہ حالت میں ہسپتال لایا گیا جبکہ ہسپتال لانے والے افراد کی تصاویر بھی سامنے آ گئی ہیں۔
پاکستان ٹائم کے مطابق گزشتہ روز پی ٹی آئی کی ریلی کے دوران پولیس کی جانب سے تشدد ، آنسو گیس کی شیلنگ کے باعث پی ٹی آئی کارکن علی بلال کو شہید کر دیا گیا تھا، جس پر پی ٹی آئی رہنما فرخ حبیب نے لاہور پولیس پر کارکن کے جاں بحق ہونے کا الزام عائد کیا تھا۔
اس حوالے سے سروسز ہسپتال انتظامیہ کا کہنا ہے کہ علی بلال کے سر اور ناک پر چوٹ لگی ہوئی ہے، علی بلال کی موت کی وجہ کا تعین ڈاکٹرکریں گے۔ نجی ٹی وی کی رپورٹ کے مطابق اب علی بلال کو مردہ حالت میں ہسپتال لانے والوں کی تصاویر سامنے آگئی ہیں ،جس میں دیکھا جاسکتا ہے کہ کالی گاڑی میں سوار 2 افراد علی بلال کو ہسپتال لائے اور ہسپتال کی ایمرجنسی کے باہر ایدھی کی ایمبولینس سے اسٹریچر پر ڈال کر دونوں افراد بلال کو ایمرجنسی کے اندر لے گئے ۔
دوسری جانب پی ٹی آئی کارکن علی بلال کی ہلاکت پرتھانہ ریس کورس میں اندراج مقدمہ کی درخواست دائر کی گئی ،پولیس کا کہنا ہے کہ درخواست شہری لیاقت علی کی جانب سے دی گئی جس میں نگران وزیراعلیٰ پنجاب، وفاقی وزیرداخلہ رانا ثنا اللہ سمیت سی سی پی اوبلال صدیق اورسب انسپکٹر ریحان کو بھی نامزد کیا گیا ہے۔
