کابل(مانیٹرنگ ڈیسک)افغانستان کے صوبہ بلخ کے گورنر محمد داود مزمل اپنے دفتر میں ہونے والے خودکش دھماکے میں جاں بحق ہو گئے۔
”پاکستان ٹائم “ کے مطابق معروف غیر ملکی خبر رساں ادارے کا اپنی رپورٹ میں کہنا ہے کہ افغان صوبہ بلخ کے گورنر محمد داود مزمل اپنے دفتر میں ایک اہم انتظامی اجلاس کی صدارت کر رہے تھے کہ عمارت کی دوسری منزل پر خود کش حملہ آور نے خود کو دھماکے سے اڑا لیا۔دھماکہ اتنا شدید تھا کہ پوری عمارت لرز اٹھی جبکہ دھماکے کی آواز دور دور تک سنائی دی ۔پولیس ترجمان کے مطابق حملے میں گورنر محمد داود مزمل کے ساتھ دو افراد جاں بحق ہو گئے ۔ پولیس کے ترجمان آصف وزیری نے بتایا کہ دھماکا ایک انتظامی اجلاس کے دوران ہوا اور تاحال کسی گروپ نے اس کی ذمہ داری قبول نہیں کی ہے۔داود مزمل اگست 2021 میں طالبان کے دوبارہ اقتدار میں آنے کے بعد کی صورتحال میں مارے جانے والے طالبان کے اعلیٰ ترین عہدے داروں میں سے ایک ہیں۔انہیں ابتدائی طور پر مشرقی صوبے ننگر ہار کا گورنر مقرر کیا گیا تھا جہاں انہوں نے داعش کے خلاف لڑائی کی قیادت کی تھی۔بعد ازاں گزشتہ برس انہیں صوبہ بلخ کا گورنر بنایا گیا تھا۔
