لاہور(وقائع نگار خصوصی)پاکستان تحریک انصاف (پی ٹی آئی) کے مرکزی صدر اور سابق وزیراعلیٰ پنجاب چوہدری پرویز الٰہی نے شہباز شریف کو خبردار کرتے ہوئے کہا ہے کہ کوئی سرکاری ادارہ الیکشن میں تعاون سے انکار کرے گا تو ذمہ دار براہ راست وزیراعظم ہوں گے۔
”پاکستان ٹائم “ کے مطابق سابق صوبائی وزیر راجا بشارت سمیت دیگر پارٹی رہنماوں سے ملاقات کے دوران چوہدری پرویز الٰہی نے گفتگو کرتے ہوئے کہا کہ آئینی طور پر کوئی ادارہ الیکشن میں تعاون سے انکار نہیں کر سکتا، سپریم کورٹ کے حکم پر پنجاب میں الیکشن کی تاریخ کا اعلان ہو چکا ہے۔سابق وزیراعلیٰ نے کہا کہ وزیر اعظم شہباز شریف اگر سپریم کورٹ کے حکم پر عملدرآمد میں رکاوٹ بنیں گے تو یوسف رضا گیلانی کی طرح گھر جائیں گے۔ان کا کہنا تھا کہ لاہور میں 8 مارچ کو زمان پارک میں نگران وزیراعلیٰ نے سانحہ ماڈل ٹاون کی خونی تاریخ دہرائی، اس خونریزی کا حساب محسن نقوی کو ہر صورت میں دینا پڑے گا ، رانا ثنا اللہ سانحہ ماڈل ٹاون، سانحہ 25 مئی اور سانحہ زمان پارک میں براہ راست ملوث ہیں، وزیر داخلہ بہت جلد قانون کے شکنجے میں ہوں گے اور اپنے انجام کو پہنچیں گے۔
