پشاور(وقائع نگار)ملک بھر میں رمضان المبارک کی آمد سے قبل ہی ہوشربا مہنگائی نے پاکستانی قوم کو ناکوں چنے چبوا دیئے ہیں تو دوسری طرف سرکاری اداروں میں براجمان طبقے کے لاڈ اور ناز نخرے ہی کم ہونے کو نہیں آتے ،رمضان المبارک کا چاند دیکھنے کے لئے پشاور میں رویت ہلال کمیٹی کی ایسی شاہ خرچی سامنے آئی ہے کہ دو وقت کی روٹی سے تنگ پاکستانی قوم کا پارہ اپنی آخری حدوں کو چھونے لگے گا ۔
”پاکستان ٹائم “ کے مطابق عام عوام دو وقت کی روٹ کے لیے آٹے کے حصول میں بھی مشکلات کا شکار ہے لیکن خیبرپختونخوا میں رمضان کا چاند دیکھنے والی رویت ہلال کمیٹی کے اجلاس کیلئے وی آئی پیز سمیت 200افراد کے کھانے کا ٹینڈرطلب کرلیا گیا۔رویت ہلال کمیٹی کی جانب سے رمضان المبارک کا چاند دیکھنے سے متعلق اجلاس کیلئے پرتعیش مینو رکھنے کا فیصلہ کیا گیا ہے۔مرغن کھانوں کیلئے کوٹیشن طلب کی گئی ہے، جو اوقاف ہال کے نوٹس بورڈ پر بھی موجود ہے۔چاند دیکھنے کے لئے آنے والے مہمانوں کی تواضع دم پخت، بیف ، چاول،سیخ کباب، تکہ بوٹی، حلوہ، رشین سلاد ،کولڈ ڈرنکس اورسبز چائے سمیت دیگر لوازمات سے کی جائے گی۔چاند دیکھنے کے لیے آنے والوں کے علاوہ عام مہمان بھی اس شاہی دسترخوان کا حصہ بنیں گے۔چاند دیکھنے کیلئے 22 مارچ کو ہونے والے اس اجلاس میں شاندار ضیافت کیلئے 200 سے زائد افراد کے کھانے کا ٹینڈر طلب کرلیا گیا ہے۔
