اسلام آباد(وقائع نگار خصوصی)وزیر اعظم شہباز شریف نے پاکستان تحریک انصاف(پی ٹی آئی )چیئرمین پر سنگین الزام عائد کرتے ہوئے انہیں عالمی مالیاتی ادارے(آئی ایم ایف)پروگرام میں بڑی رکاوٹ قرار دے دیا ۔
”پاکستان ٹائم “ کے مطابق وزیر اعظم شہباز شریف نے اپنے بیان میں کہا کہ عمران خان اپنے ہی آئی ایم ایف پروگرام کی بحالی ناکام بنانے کی کوشش کر رہا ہے،سڑکوں پر افراتفری اور فتنہ وفساد اسی ایجنڈے کا حصہ ہے،عمران خان چاہتا ہے کہ ملک میں عدم استحکام کی آگ بھڑکے،یہ نہیں چاہتا کہ غریب عوام کو مہنگائی،معاشی دباوسے نجات ملے، پاکستان کے لئے وسائل کی راہ ہموار ہو۔عمران خان پر تنقید کرتے ہوئے وزیر اعظم نے کہا کہ مسلم لیگ ن کے رہنما سزائے موت کی چکیوں میں رہے،ہیروئن جیسے جھوٹے مقدمات کا سامنا کیا،نواز شریف اور ن لیگ کی قیادت نے نیب نیازی گٹھ جوڑ کے بد ترین انتقام کا سامنا کیا ہے،ہم اپنے بیٹوں، بیٹیوں اور بہنوں سمیت جھوٹے مقدمات میں عدالتوں اور قانون کے آگے پیش ہوئے،عمران خان پہلے اپنے وعدوں اور نظریات سے بھاگ گئے،اب عدالتوں سے بھاگ رہے ہیں،بزدل شخص عدالت کو تلاشی نہیں دیتا کیونکہ مجرم ہے،عمران خان کا عدالتوں سے بھاگنا بزدلی کی انتہاءہے، پہلے آئی ایم ایف پروگرام سے بھاگ گئے،اب عدالتوں سے بھاگ رہے ہیں۔
