کراچی(سٹاف رپورٹر)پنجاب کی نگران حکومت کے بعد سندھ میں پیپلز پارٹی کی صوبائی حکومت نے بھی پاکستان تحریک انصاف(پی ٹی آئی )کے خلاف شکنجہ کستے ہوئے پولیس کو تحریک انصاف کے رہنماوں اور کارکنوں کے گھروں پر چھاپوں کے احکامات جاری کردیئے ہیں،پولیس نے پی ٹی آئی کارکنوں کی پکڑ دھکڑ شروع کردی ہے جبکہ اہم پارٹی رہنما ،رکن سندھ اسمبلی اور سیکرٹری جنرل کراچی ارسلان تاج کو گرفتار کر لیا گیا ہے۔
”پاکستان ٹائم “ کے مطابق کراچی میں پی ٹی آئی کے رہنما رکن سندھ اسمبلی ارسلان تاج کو پولیس نے گرفتار کر لیا ہے،پی ٹی آئی کے ترجمان کے مطابق ارسلان تاج کو ان کی رہائش گاہ گلشن اقبال سے گرفتار کیا گیا ہے،ارسلان تاج کو سادہ لباس اہلکاروں نے گرفتار کیا۔دوسری جانب کراچی میں پولیس کی جانب سے فجر کے اوقات رکن سندھ اسمبلی راجا اظہر اور خرم شیر زمان کے گھر پر بھی چھاپہ مارا گیا۔ترجمان پی ٹی آئی کا کہنا تھا کہ پولیس کی جانب سے راجا اظہر کی فیملی کو ہراساں کیا گیا،چھاپے کے وقت ایم پی اے راجا اظہر اور خرم شیر زمان گھر پر موجود نہیں تھے،ترجمان پی ٹی آئی نے کہا ہے کہ پولیس کی جانب سے غیر قانونی کارروائیوں کی مذمت کرتے ہیں،آج ایک بار پھر پولیس نے چادر اور چار دیواری کا تقدس پامال کیا،وزیر اعلیٰ اور آئی جی سندھ سے مطالبہ کرتے ہیں کہ ارسلان تاج کو فوری رہا کیا جائے،پارٹی قائدین سے مشاورت کے بعد لائحہ عمل کا اعلان کریں گے۔
