کراچی(وقائع نگار)پاکستان ڈیموکریٹک اتحاد(پی ڈی ایم) خطرے میں پڑ گیا،اہم اتحادی جماعت پاکستان پیپلز پارٹی کی سندھ حکومت نے وفاق کو بڑی دھمکی دیتے ہوئے کہا ہے کہ مردم شماری پر ہمارے اعتراض درست نہ ہوئے تو ہم اس کی حمایت نہیں کریں گے۔
”پاکستان ٹائم “ کے مطابق کراچی میں منعقدہ تقریب سے خطاب کرتے ہوئے وزیر اعلیٰ سندھ سید مراد علی شاہ نے کہا کہ مردم شماری انتخابات سے زیادہ اہم اور ضروری ہے،ڈیجیٹل پراسس چل رہا ہے،احسن اقبال کو میں نے خط بھی لکھا تھا،ایسی مردم شماری چاہتے ہیں جس پر کسی کو اعتراض نہ ہو،ہمارا موقف ہے کہ 2017 کی مردم شماری نہ دہرائی جائے تاکہ پھر تحفظات نہ ہوں،اگر مردم شماری پر ہمارے اعتراض درست نہ ہوئے تو ہم اس کی حمایت نہیں کریں گے، ایسی صورتحال پیدا نہ کریں کہ مردم شماری کو قبول نہ کریں۔
مراد علی شاہ نے کہا کہ مردم شماری کے ٹیبلٹس میں نقشوں کی خامیاں دکھائیں تو کہا گیا کہ کچھ خامیوں کو بعد میں درست کردیں گے،ہم نے کہا کہ خامیاں فوری درست کریں،ہمارا اندراج کر کے ہمیں آگاہ کیا جائے،ہر فرد کو ایس ایم ایس کے ذریعے درج تفصیل بتائیں،شمار کنندہ کے درج ریکارڈ کو ہم خود دیکھ سکیں گے،جس پر ہمیں کہا گیا کہ ڈیٹا دینے کے لیے پالیسی فیصلے کی ضرورت ہوگی،ہمیں پتہ ہونا چاہیے کہ سب کو گنا گیا،پاکستانی شہری کتنے اور غیرملکی کتنے ہیں؟ہم نے کہاکہ مردم شماری کا ڈیٹا نادرا کو دے دیں،نادرا سے کہیں کہ اس ڈیٹا سے ان کا شناختی کارڈ بنائیں، اس طرح پوری آبادی کا ریکارڈ صحیح آجائے گا۔
وزیر اعلی سندھ نے کہا کہ ملک شدید مالی بحران سے گزر رہا ہے،ایک شخص کے کہنے پر اسمبلیاں تحلیل کی گئیں،ہم سیاسی جماعت ہیں ہم الیکشن میں جائیں گے،اکتوبر میں قومی اسمبلی کے الیکشن ہونے ہیں،جب قومی اسمبلی الیکشن ہوں گے تو پنجاب میں سیاسی حکومت ہوگی،عدالتوں کو آئینی پیچیدگیوں کو دیکھنا چاہیے،عدالتوں سے بصد احترام کہناچاہتاہوں،کبھی کبھی میڈیا کے دباو پر بھی فیصلے کئے جاتے ہیں۔وزیر اعلیٰ سندھ نے کہا کہ اخلاق سے گری ہوئی باتیں کرنے کا رواج پی ٹی آئی نے ڈالا ہے،سندھ میں سب محبت بھائی چارگی سے رہتے ہیں،الزام لگانے کی سیاست سندھ میں نہیں چلے گی،کوئی پر امن احتجاج کرنا چاہے تو اس کی اجازت ہے،اخلاق سے گری ہوئی بات نہیں کرنے دیں گے،گری ہوئی باتوں کا سخت قانونی جواب دیں گے۔
