اسلام آباد(سٹاف رپورٹر)قبائل فورم نے ایک بار پھر الیکشن موخر کرنے کا مطالبہ کرتے ہوئے کہا ہے کہ نئی مردم شماری اور اس کی بنیاد پر حلقہ بندیوں کے تحت انتخابات نہ ہوئے تو بائیکاٹ کریں گے۔
”پاکستان ٹائم “ کے مطابق قبائل فورم نے نئی مردم شماری اوراس کی بنیاد پر حلقہ بندیوں کے تحت انتخابات کا انعقاد کرانے کا مطالبہ کر دیا۔قبائلی عمائدین نے کہا کہ پرانی مردم شماری پر انتخابات ہوئے تو بائیکاٹ کریں گے،چند ماہ انتخابات کا عمل روکنے سے کوئی قیامت نہیں آجائے گی۔قبائلی عمائدین نے حکومت سے مطالبہ کیا ہے کہ خیبرپختونخوا اسمبلی اور قومی اسمبلی کے انتخابات نئی مردم شماری تک چند ماہ کے لئے موخر کیے جائیں۔رکن قومی اسمبلی مولانا جمال الدین نے کہا کہ آبادی کے لحاظ سے ہمارا حق زیادہ سیٹوں کا بنتا ہے،الیکشن کمیشن،سپریم کورٹ اور ہائیکورٹ ہمارے مطالبہ پر نئی مردم شماری پر انتخابات کا حکم دیں۔سابق ایم این اے مولانا عبدالمالک اور دیگر کا کہنا تھا کہ پچھلی مردم شماری بددیانتی پرمبنی تھی جس کا مقصد قبائل کو کم تعداد میں ظاہرکرنا تھا،قبائل نے پاکستان کے لئے بہت قربانیاں دی ہیں،ہمارے مطالبات تسلیم کئے جائیں،قبائل کو کسی سخت ردعمل پر مجبور نہ کیا جائے۔
