کراچی(نیوز رپورٹر)پاکستان پیپلز پارٹی کی سندھ حکومت نے متحدہ قومی موومنٹ(ایم کیو ایم)پاکستان کے سامنے ہتھیار ڈالتے ہوئے بڑا مطالبہ منظور کرلیا ہے اور اس حوالے سے اضافی یوسیز کا نوٹیفکیشن جاری کردیا ہے۔
”پاکستان ٹائم “ کے مطابق پیپلز پارٹی کی سندھ حکومت نے ایم کیو ایم پاکستان کا بڑا مطالبہ منظور کرتے ہوئے کراچی کے بلدیاتی نظام میں بڑی تبدیلی کردی ہے۔سندھ حکومت نے کراچی میں 53 یونین کمیٹیز کا اضافہ کیا ہے اور اضافی یوسیز کا نوٹیفکیشن بھی جاری کردیا گیا ہے۔اضافی یوسیز کا نوٹیفکیشن جاری ہونے کے بعد اب کراچی میں بلدیاتی کونسلز کی تعداد 246 سے بڑھ کر 299 ہو گئی ہے۔
یاد رہے کہ رواں سال کے آغاز میں ایم کیو ایم پاکستان نے کراچی میں حلقہ بندیوں پر اعتراض کرتے ہوئے کہا تھا کہ شہر میں یونین کونسلز اور ٹاونز کی تشکیل غلط اور بدنیتی پر مبنی ہے۔ایم کیو ایم پاکستان نے 15 جنوری کو انتخابات کے انعقاد کے خلاف سندھ ہائی کورٹ اور پھر سپریم کورٹ سے رجوع کیا جس میں موقف اختیار کیا کہ حلقہ بندیاں دوبارہ کی جائیں۔ایم کیو ایم کی درخواست میں موقف اختیار کیا گیا تھا کہ اگر شہر میں حلقہ اور حد بندیاں درست نہ ہوئیں تو ان کی بنیاد پر ہونے والے انتخابات غیرمنصفانہ ہوں گے۔
