لاہور(وقائع نگار خصوصی)پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے اتوار کو مینار پاکستان پر جلسے کا اعلان کرتے ہوئے کہا ہے کہ میں آپ سب کی جنگ لڑ رہا ہوں، ملک آج تباہی کے دہانے پر کھڑا ہے،ساری قوم کو مل کر جدوجہد کرنی ہو گی۔
لاہور میں تحریک انصاف کی ریلی سے خطاب میں عمران خان نے کہا کہ اتوار کو دوپہر 2 بجے مینار پاکستان پر جلسہ کریں گے، ہم مل کر جدوجہد کریں گے اور ملک کو بچائیں گے،لیکشن سے باہر کرنے کیلئے ہر حربہ استعمال کیا جارہا ہے، میرے اوپر 80 کیسز بنائے گئے ہیں، ان لوگوں نے ہر قسم کی کردار کشی کی کوشش کی،توشہ خانہ کیس میں دودھ کا دودھ پانی کا پانی ہو گیا، فارن فنڈنگ کیس میں ن لیگ کی فنڈنگ سامنے آئی تو سب پتا چل جائے گا،ن لیگ اور پیپلزپارٹی کی فارن فنڈنگ سے متعلق جلد نیا انکشاف ہونے والا ہے۔عمران خان نے کہا کہ کارکنوں پر تشدد کرنے والوں کو سزا دلواو¿ں گا، کبھی ذاتی مفاد کے لیے سڑکوں پر نہیں نکلا، یہ میری نہیں بلکہ سب کی جنگ ہے، ہمیں روکنے کے لیے تمام حربے استعمال کیے جا رہے ہیں، جنہوں نے تحریک انصاف کے کارکنوں پر تشدد کیا ان سے پوچھا جائےگا، زمان پارک سے نکلتا ہوں تو زندگی کو خطرہ ہوتاہے، میں آپ سب کی جنگ لڑ رہا ہوں، ملک آج تباہی کے دہانے پر کھڑا ہے۔
