لاہور (سٹاف رپورٹر)لاہور ہائیکورٹ نے لاہور میں دفعہ 144 کے نفاذ کے خلاف دائر درخواست پر سماعت کرتے ہوئے ، پنجاب حکومت سے ریلی اور جلسے جلوسوں سے متعلق اپنائی گئی حکمت عملی پر رپورٹ طلب کر لی ہے ۔
”پاکستان ٹائم “کے مطابق ایڈیشنل ہوم سیکرٹری پنجاب عدالت میں پیش ہوئے ، جسٹس طارق سلیم شیخ نے ایڈیشنل سیکرٹری ہوم کو ریلی اور جلوسوں سے متعلق اپنائی جانے والی حکمت عملی کی رپورٹ پیش کرنے کا حکم دیتے ہوئے کہا کہ بتائیں کہ دفعہ 144 کس موقع پر اور کیوں لگاتے ہیں؟ عدالت شہریوں اور سیاسی جماعتوں کے بنیادی حقوق کی ضامن ہے۔
جسٹس طارق سلیم شیخ نے اپنے ریمارکس میں کہا کہ سیاسی جماعت کا اعتراض ہے کہ جب بھی ریلی نکالنی ہوتی ہے یہ اس صبح دفعہ 144 نافذ کر دیتے ہیں، دوسری جانب درخواستگزار کے عدالت میں نہ موجود ہونے پر حماد اظہر کے وکیل سے پوچھا گیا کہ اظہر صاحب بتائیں درخواست گزار کیوں پیش نہیں ہوئے؟ جس پر وکیل نے جواب دیا کہ حماد اظہر کاغذات نامزدگی جمع کروانے گئے ہیں، آج کاغذات جمع کروانے کی آخری تاریخ ہے۔
جسٹس طارق سلیم شیخ نے اپنے ریمارکس میں کہا کہ ہم اس کیس کا فیصلہ کرنا چاہتے ہیں سینئر قیادت کا ہونا ضروری ہے، کل صبح 10 بجے کیلئے سماعت رکھ لیتے ہیں۔
