لاہور(نیوز رپورٹر) پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کے ناقابل ضمانت وارنٹ گرفتاری پر تعمیل کے لیے پولیس اور پی ٹی آئی کارکن آمنے سامنے آگئے، زمان پارک میدان جنگ بن گیا،رات گئے تک کارکنوں کی بڑی تعداد میں زمان پارک آمد ،رینجرز کی تعیناتی کے باوجود پی ٹی آئی کارکن کسی صورت بھی عمران خان کو گرفتار کرنے کی اجازت دینے کے لئے تیار نہیں تاہم دوسری طرف پولیس کے تازہ دم دستے زمان پارک پہنچ گئے ہیں ،شیلنگ کا سلسلہ رات 12بجے بھی جاری رہا جبکہ کارکن بھی اپنے قائد کی حفاظت کے لئے مسلسل مزاحمت جاری رکھے ہوئے ہیں۔
”پاکستان ٹائم “ کے مطابق عمران خان کے ناقابل ضمانت وارنٹ گرفتاری جاری ہونے کے بعد اسلام آباد پولیس کی ٹیم لاہور پولیس کی بھاری نفری کے ساتھ زمان پارک موجود ہے،پولیس نے زمان پارک جانے والے تمام راستے بند کر دیے ہیں، پولیس کو پی ٹی آئی کے کارکنوں کی طرف سے شدید مزاحمت کا سامنا کرنا پڑ رہا ہے۔پولیس کی بکتر بند گاڑیاں زمان پارک پہنچ گئی ہیں، پی ٹی آئی کارکنوں کی بھی آمد جاری ہے جبکہ ڈنڈا بردار کارکن بھی موقع پر موجود ہیں۔پولیس کی جانب سے دو افسروں نے گرفتاری کا نوٹس وصول کرانے کے لیے ہاتھ میں پلے کارڈ اٹھا رکھے ہیں،پلے کارڈز پر نوٹس وصول کرانے کے حوالے سے تحریر موجود ہے۔ پولیس ذرائع کا کہنا ہے کہ شہر کے تمام تھانوں میں نفریاں اکٹھی کی جا رہی ہیں،اینٹی رائٹ یونٹ کو آنسو گیس کے شیل بھی فراہم کر دیے گئے ہیں،ایک ہزار سے زائد نفری کو الرٹ رہنے کا حکم دیا گیا ہے۔مسلسل سارا دن پولیس اور پی ٹی آئی کارکنوں کے درمیان آنکھ مچولی کا سلسلہ جاری رہنے کے بعد رات گئے پولیس کی نئی نفری زمان پارک پہنچ گئی ہے،پولیس کی جانب سے عمران خان کی رہائش گاہ کے اندر شیلنگ کی جا رہی ہے ،زمان پارک میں عمران خان کی رہائش گاہ کے باہر کارکنوں کی بھاری تعداد موجود ہے،پولیس کی جانب سے عمران خان کی رہائش گاہ کے اندر آنسو گیس کی شیلنگ کے بعد کارکنوں نے عمران خان کی رہائش گاہ کے اندر سے پولیس پرپتھراو کیا جس کے باعث پولیس پیچھے ہٹنے پر مجبور ہو گئی،رات گئے ایک بار پھر پولیس نے دوبارہ سے واٹر کینن اور شیلنگ کا استعمال شروع کر دیاہے جبکہ فوری طور پر رینجرز کو طلب کر لیا گیا، اس دوران پولیس نے چاروں اطراف سے زمان پارک کو گھیر لیا ہے۔
