لاہور (سٹاف رپورٹر ) صوبائی دارالحکومت لاہور کی سب سے بڑی عدالت لاہور ہائیکورٹ نے چیئر مین پاکستان تحریک انصاف (پی ٹی آئی )عمران خان کی گرفتاری کیلئے پولیس آپریشن پر حکم امتناع میں کل تک توسیع کر دی ہے ۔
پاکستان ٹائم کے مطابق لاہور ہائی کورٹ نے زمان پارک میں سابق وزیر اعظم عمران خان کی گرفتاری کے لیے پولیس آپریشن پر حکم امتناع میں کل تک توسیع کردی ہے ، گزشتہ روز عدالت نے عمران خان کی گرفتاری کے لیے پولیس آپریشن آج صبح 10 بجے تک روکنے کا حکم دیا تھا۔
آج لاہور ہائی کورٹ میں پولیس آپریشن کے خلاف درخواست پرسماعت میں عدالت نے کہا کہ آج آپ اکٹھے بیٹھ کر اس کا حل نکالیں، بحیثیت قوم ہماری بڑی بےعزتی ہو رہی ہے، اپنی ریلی کو آگے پیچھے کر لیں، خداکاواسطہ ہے قوم کی زندگی کو چلنے دیں،عدالت نے ریمارکس دیے کہ نہ لاہور ہائی کورٹ اور نہ اسلام آباد ہائی کورٹ نے وارنٹ گرفتاری پر عمل سے روکا ہے۔
