لاہور (سٹاف رپورٹر )پاکستان سپر لیگ (پی ایس ایل) کا ٹائٹل مسلسل دوسرے سال جیتنے والی ٹیم لاہور قلندر زکے کپتان شاہین شاہ آفریدی کا کہنا ہے کہ افغانستان کے خلاف ٹی ٹوئنٹی سیریز میں خود پی سی بی کو کال کر کے آرام مانگا تھا۔
پاکستان ٹائم کے مطابق شاہین شاہ کا کہنا تھا کہ ہم تینوں نے (شاہین ، بابر ، رضوان )پی سی بی سے آرام مانگا تھا اور ہم نے بورڈ سے بھی بات کی ہے، ہمارا فوکس ایشیا کپ اور ورلڈکپ پر ہے، ون ڈے کرکٹ کھیلنا چاہتے ہیں اور نیوزی لینڈ کی سیریز میں ایکشن میں نظر آئیں گے۔
انہوں نے مزید کہا کہ پاکستان میں فاسٹ بولروں کی بڑی تاریخ رہی ہے، اس پاکستان سپر لیگ کی کارکردگی سے زمان خان اور احسان اللہ کو پاکستان ٹیم میں موقع ملا، امید ہے کہ ان نوجوان فاسٹ بولروں نے جس طرح پی ایس ایل میں کارکردگی دکھائی اسی طرح وہ افغانستان کی سیریز میں پاکستان کے لیے کارکردگی دکھائیں گے اور پاکستانی فاسٹ بولنگ کا کور مضبوط ہوگا۔
شاہین آفریدی کا کہنا تھا کہ میری ٹیم ڈیمانڈ کرتی ہے کہ میچز میں جلد وکٹ لے کردوں، میں چاہے لیگ کھیلوں یا ملک کیلئے، میں جلد وکٹ لینے کی کوشش کرتا ہوں تاکہ دوسری ٹیم کو دباومیں لا سکوں، انہوں نے کہا کہ حارث روف دنیا کا بہترین بولر ہے ، مجھے اس پر اندھا اعتماد رہتا ہے، اگر اس نے 22 رنز دیے ہیں تو پھر بھی اچھے بولرز ہیں ان پر اعتماد ہے۔
فاسٹ بولر نے کہا کہ قلندرز ٹیم کی فتوحات میں عاقب بھائی کا بڑا کریڈٹ ہے اور ٹیم انتظامیہ عاطف بھائی اور ثمین بھائی کا ہم سب پر اعتماد ہے، مجھے ایسے وقت پر کپتانی دی جس وقت محمد حفیظ سمیت کئی سینئرز ٹیم کا حصہ تھے ، میں نے ذمہ داری سنبھالی اور جب ذمہ داری ملی تو میں نے اسے چیلنج سمجھ کر قبول کیا، الحمد اللہ اب تک اچھا سفر جارہا ہے اور ٹائٹل جیت رہے ہیں۔
