کارکنوں کی گرفتاریاں اور تشدد،عمران خان کا عالمی تنظیموں سے رجوع کرنے کا اعلان

لاہور(خصوصی رپورٹر)پاکستان تحریک انصاف(پی ٹی آئی)کے سربراہ اور سابق وزیر اعظم عمران خان نے اپنے کارکنوں کی گرفتاریوں اور پولیس تشدد کے خلاف عالمی تنظیموں سے رجوع کرنے کا اعلان کر تے ہوئے مسلم لیگ ن کی چیف آرگنائزر مریم نواز کا نام لئے بغیر کڑی تنقید کی اور کہا کہ جھوٹوں کی ملکہ ایسے پھر رہی ہے، جیسے پاکستان اس کی جاگیر ہے، کہہ رہی ہے میرا باپ نیلسن منڈیلا ہے، اسے معاف کردو۔
”پاکستان ٹائم“ کے مطابق سابق وزیراعظم عمران خان نے مائیکرو بلاگنگ ویب سائٹ پر ٹویٹ کرتے ہوئے کہا کہ حکومت نے ہمارے کارکنوں کو جیلوں میں ڈالا، عدالتوں کے ساتھ انسانی حقوق کی تنظیموں سے رجوع کریں گے۔عمران خان نے بیرون ملک پی ٹی آئی تنظیموں کو مقامی منتخب سیاستدانوں سے رابطہ کرنے کا کہا،ان کا کہنا تھا کہ اپنی اپنی حکومتوں کو پاکستان میں جاری فاشزم سے آگاہ کریں،مجھے مارنے کے لیے کیسے جال میں پھنسایا گیا جلد ہی بے نقاب کروں گا،ان کا کہنا تھا کہ جوڈیشل کمپلیکس میں مجھے قتل کرنے کی سازش کی گئی اور اللہ نے مجھے بچایا۔دوسری طرف ویڈیو لنک کے ذریعے خطاب کرتے ہوئے عمران خان نے کہا کہ جس شخص نے مجھے گولیاں ماریں وہ ویڈیو کال پر آسکتا ہے،ٹول پلازا سے جوڈیشل کمپلیکس تک پہنچنے میں ساڑھے 4 گھنٹے لگے،پیشی کے لیے جارہا تھا،عام لوگ پتا نہیں کہاں سے آئے اور ساتھ چلنا شروع ہوگئے،جوڈیشل کمپلیکس پہنچنے پر پولیس اوپر سے پتھراو اورشیلنگ کر رہی تھی،یہ معجزہ بھی دیکھا کہ ہوا کی سمت اس طرف ہوگئی جہاں سے شیلنگ ہو رہی تھی،جوڈیشل کمپلیکس میں نامعلوم افراد موجود تھے،وہاں ہمارے وکلاءپر ڈنڈے برسائے گئے،ایک شخص قانون کی بالادستی کے لیے اسلام آباد آتا ہے اور یہ ہوتا ہے،ایک آدمی کے لیے اتنی پولیس اور ایف سی تو میں نے دیکھی ہی نہیں،جو ملک میں حالات ہو رہے ہیں،پوری زندگی ایسے حالات نہیں دیکھے۔
انہوں نے کہا کہ تقریباً 100 کیسز میرے خلاف ہوچکے ہیں، جب باہر نکلتا ہوں، میری جان کو خطرہ ہوتا ہے،یہ الیکشن کی فضا ہی نہیں بننے دے رہے،جمہوریت اور آئین کا قتل ہورہا ہے،کسی کو آئین کی فکر نہیں، 30 اپریل کو الیکشن ہے، کوئی فضا بننے ہی نہیں دے رہے،مینار پاکستان پر جلسے کی بھی اجازت نہیں دی جارہی،یہاں کوئی قانون نہیں،جنگل کا قانون ہے، بدھ کو جلسہ کرنا تھا،اب پتہ چلا ہے کل عدالت فیصلہ کرے گی،میرے گھر کی دیوار،دروازہ توڑا گیا،یہاں تقسیم کرنے کی کوشش کی جارہی ہے۔عمران خان نے کہا کہ پی ٹی آئی انتشار نہیں الیکشن چاہتی،باربار کہہ رہا ہوں ہمیں کسی قسم کا ہتھیار نہیں اٹھانا،فوج بھی میری، ملک بھی میرا،میرا جینا مرنا یہیں ہے باہر نہیں بھاگنا،ایسی کیا غلطی کی کہ مجھ پر دہشت گردی کے مقدمات بنادیے گئے،تمام ثبوت اکٹھے کر رہے ہیں،انٹرنیشنل ہیومین رائٹس کو بھجوا رہے ہیں،یورپی یونین کو بھی ثبوت بھجوائیں گے،سب کو بتائیں گے۔