لاہور(مانیٹرنگ ڈیسک)چیئر مین پاکستان تحریک انصاف (پی ٹی آئی )عمران خان کی جانب سے سابق آرمی چیف پر مسلسل تنقید کے بعد اب جنرل ریٹائرڈ قمر جاوید باجوہ نے بھی چپ توڑ دی ہے ۔
”پاکستان ٹائم “نے نجی ٹی وی کے حوالے سے بتایا کہ ایک انٹرویو میں سابق آرمی چیف جنرل (ر) قمر جاوید باجوہ نے کہا ہے کہ عمران خان جھوٹ بولنے میں بہت مہارت رکھتے ہیں اور لوگ اس پر یقین کرلیتے ہیں، جنرل ریٹائرڈ باجوہ سے سوال کیا گیا کہ مریم نواز کے کمرے کے دروازے توڑنے کا حکم کس نے دیا تھا؟ جس پر سابق آرمی چیف کا کہنا تھا کہ بریگیڈئیر حبیب اس وقت سیکٹر کمانڈر تھے، جنرل فیض نے مقدمہ درج کرنے کا کہا مگر نچلے لیول پر کچھ زیادہ ہوگیا، ہم نے ذمہ دار افسر کو ہٹا دیا تھا۔
اعظم سواتی اور شہبازگل کو ننگا کرنے کے الزام پر جنرل (ر) باجوہ نے کہا ان کا ان واقعات سے کوئی تعلق نہیں، بعض اوقات ایجنسیوں میں شاہ سے زیادہ شاہ کے وفادار بننے کی کوشش ہوتی ہے، یہ سب نچلی سطح پر ہوتا ہے ،ایک سوال کے جواب میں سابق آرمی چیف نے کہا کہ شیخ رشید سے زندگی میں صرف دو بار ملاقات ہوئی ہے ، شیخ رشید نے کہا تھا کہ عمران خان سے حکومت نہیں چل رہی جنرل صاحب کچھ کریں۔
