اسلام آباد(وقائع نگار)وفاقی وزیر اطلاعات اور پاکستان مسلم لیگ ن کی مرکزی ترجمان مریم اورنگزیب نے کہا ہے کہ زمان پارک لاہور اور جوڈیشل کمپلیکس اسلام آباد میں پولیس اہلکاروں پر حملہ ہوا،عمران خان کہتے ہیں ان کی بیوی ڈر گئی،کیا پنکی باجی(بشریٰ بی بی)کو ہیرے اور انگوٹھیاں لیتے ڈر لگا تھا اور ان کی چیخیں نکلتی تھیں؟۔
”پاکستان ٹائم کے مطابق مائیکرو بلاگنگ ویب سائٹ پر پاکستان تحریک انصاف(پی ٹی آئی)کے سربراہ عمران خان کی جانب سے عدالت میں دیئے گئے بیان پر طنز کرتے ہوئے مریم اورنگزیب کا کہنا تھا کہ کیا پنکی باجی(بشریٰ بی بی) کو ہیرے اور انگوٹھیاں لیتے ڈر لگا تھا اور ان کی چیخیں نکلتی تھیں؟لاہور اور اسلام آباد میں پی ٹی آئی کارکنان کی جانب سے پولیس کے سر توڑنے،پٹرول بم پھینکنے،جوڈیشل کمپلیکس پہ مسلح جتھوں سے حملہ آور ہونے کے بعد تمہاری بیوی(عمران خان کی اہلیہ )ڈر گئی؟۔وفاقی وزیر اطلاعات مریم اورنگزیب نے کہا کہ کیا اس وقت شرم اور حیا کہاں تھی جب مریم نواز کے بیڈ روم میں رات کو گھسنے کا آرڈر دیا تھا؟مریم کے نیب سیل میں کیمرہ لگا کر اپنے موبائل پہ دیکھتے تھے،اس وقت شرم کہاں تھی؟شہباز شریف کی بیٹی کے گھر نیب کو حملہ کرنے کا حکم دیتے ہوئے،فریال تالپور کو عید پر ہسپتال سے گھسیٹ کر لاتے ہوئے اور مسجد نبوی اور لندن میں مجھ پر حملہ کراتے شرم آئی تھی؟۔مریم اورنگزیب کا کہنا تھا کہ دہشت گرد چھپ کر ہی عدالت آتے ہیں،وقت دور نہیں منہ چھپا کر آنا پڑے گا۔
یاد رہے کہ چیئرمین تحریک انصاف عمران خان نے لاہور ہائی کورٹ میں عدالت کے سامنے پیش ہوکر بیان دیا کہ میری اسلام آباد عدالت میں پیشی کے موقع پر میری غیر موجودگی میں پولیس نے میرے گھر پر حملہ کیا اور شیشے توڑ دیئے، میری اہلیہ بشریٰ بی بی پردہ کرتی ہیں،وہ شیشے کے پیچھے تھیں،جب شیشے توڑے گئے تو وہ ڈر گئیں اور انہوں نے چیخیں بھی ماری،میں آج چھپ کر عدالت پہنچا ہوں اور اس گاڑی میں آیا ہوں جسے کوئی نہیں جانتا۔
