لاہور(وقائع نگار)امیر جماعت اسلامی پاکستان سراج الحق نے مطالبہ کیا کہ تمام سیاسی جماعتیں بیٹھ کر شفاف الیکشن کا اعلان کریں۔
”پاکستان ٹائم “ کے مطابق سراج الحق نے کہا کہ متحدہ مجلس عمل( ایم ایم اے)کے دور میں خیبر پختونخوا میں گیس کے ذخائر دریافت ہوئے، جس سے صوبے کی 60 کروڑ روپے کی آمدن ہوئی، ملک میں 18 افراد کے پاس 4 ہزار ارب کے اثاثے موجود ہیں جب کہ 9.60 کھرب بجٹ اور 4.1 کھرب سود میں چلا جاتا ہے بجٹ میں 4 کھرب روپے صوبوں کو ملتے ہیں، وزیر خزانہ نے ترقیاتی بجٹ پر کٹ لگانے کا عندیہ دیا ہے، ملک کیسے چلے گا؟۔انہوں نے کہا کہ ملک کے ساتھ پاکستان ڈیمو کریٹک موومنٹ( پی ڈی ایم) اور پاکستان تحریک انصاف(پی ٹی آئی) نے جو کرنا تھا کر لیا، لہٰذا تمام سیاسی جماعتیں بیٹھ کر شفاف انتخابات کا اعلان کریں۔امیر جماعت اسلامی کا کہنا تھا کہ خیبر پختونخوا کے بہت سے لوگ کچے میں یرغمال ہیں، کچے کے علاقے میں سندھ کی کوئی رٹ نہیں۔
