اسلام آباد(وقائع نگار خصوصی)وفاقی وزیر داخلہ رانا ثناءاللہ نے سابق وزیراعظم اور پاکستان تحریک انصاف(پی ٹی آئی) کے چیئرمین عمران خان کی عدالتوں میں پیشیوں کے دوران ہنگامہ آرائی پر جے آئی ٹی کا اعلان کردیا۔
”پاکستان ٹائم“ کے مطابق اسلام آباد میں پریس کانفرنس کرتے ہوئے رانا ثناءاللہ نے کہا کہ جوڈیشل کمپلیکس پر کارکنوں نے حملہ کیا، کارکنوں نے جوڈیشل کمپلیکس میں توڑ پھوڑ کی، ہنگامہ آرائی سے عدالتی کارروائی پر اثر انداز ہونے کی کوشش کی گئی، ہنگامہ آرائی کے خلاف تھانہ رمنا میں مقدمہ درج کیا گیا، یہ واقعہ دہشت گردی کے زمرے میں آتا ہے، اسلام آبادہائی کورٹ کا بھی مین گیٹ کو توڑا گیا، عدالتی عملے اور پولیس پر حملہ کیا گیا، رینجرز، پولیس، قانون نافذ کرنے والے اداروں پر حملہ کیا گیا جس کے خلاف سی ٹی ڈی اسلام آباد، تھانہ گولڑہ میں مقدمات درج ہوئے، ان واقعات کے عمران خان سمیت تمام افراد ذمہ دار ہیں۔وزیر داخلہ کا کہنا تھا کہ ایڈیشنل آئی جی پنجاب کی سربراہی میں جوائنٹ انویسٹی گیشن ٹیم(جے آئی ٹی ) بنائی گئی ہے جس میں انٹر سروسز انٹیلیجنس (آئی ایس آئی)، انتیلی جنس بیورو (آئی بی)، ملٹری انٹیلی جنس (ایم آئی) کے نمائندے اور ڈی آئی ہیڈ کوارٹر اویس شامل ہوں گے، جے آئی ٹی مجرموں کے خلاف شفاف تحقیقات عمل میں لائے گی، 14 روز میں جے آئی ٹی تفتیش کرکے چلان عدالتوں میں جمع کرائے گی اور ان مجرموں کو انصاف کے کٹہرے میں لایا جائے گا۔خیال رہے کہ گزشتہ دنوں وفاقی حکومت نے عمران خان کی جوڈیشل کمپلیکس پیشی اور بعد میں ہونے والے پرتشدد واقعات کی تحقیقات کے لئے جے آئی ٹی بنانے کا فیصلہ کیا تھا۔
