اسلام آباد (ویب ڈیسک )چیئر مین پاکستان تحریک انصاف کی مشکلات میں دن بدن اضافہ دیکھنے میں آ رہا ہے ایک طرف ان کے خلاف مقدمات نے سینچری مکمل کر لی ہے اور تاحال اننگز جاری ہے، دوسری جانب ان کے بھانجے اور اہم پی ٹی آئی رہنما حسان نیازی کو اسلام آباد کی مقامی عدالت نے ایک روزہ راہداری ریمانڈ پر کوئٹہ پولیس کے حوالے کر دیا ہے ۔
”پاکستان ٹائم “کے مطابق وفاقی دارالحکومت اسلام آباد کی مقامی عدالت نے عمران خان کے فوکل پرسن حسان نیازی کو ایک روزہ راہداری ریمانڈ پر کوئٹہ پولیس کے حوالے کر دیا، جوڈیشل مجسٹریٹ مریدعباس نے کوئٹہ پولیس کی جانب سے حسان نیازی کو کوئٹہ کے جوڈیشل مجسٹریٹ کے سامنے پیش کرنے کے لیے راہداری ریمانڈ کی درخواست پر سماعت کی اور کوئٹہ پولیس کو حسان نیازی کا ایک روزہ راہداری ریمانڈ دے یا۔
عدالت نے تفتیشی افسر کو ہدایت کی کہ حسان خان نیازی کو متعلقہ عدالت میں 25 مارچ کو پیش کرے، حکم نامے میں مزیدکہا گیا ہے کہ تفتیشی افسر کی جانب سے ملزم کو تھانہ ایئر پورٹ کوئٹہ بلوچستان میں درج ایف آئی آر کے حوالے سے کوئٹہ مجسٹریٹ کے سامنے پیش کرنے کے لیے راہداری ریمانڈ کی درخواست کی گئی تھی۔
واضح رہے کہ پی ٹی آئی رہنما حسان خان نیازی کو 20 مارچ کو گرفتار کیا گیا تھا، ان پر کار سرکار میں مداخلت اور اسلحہ دکھانے کا الزام عائد کیا گیا اور ان کے خلاف تھانہ رمنا میں اے ایس آئی خوبان شاہ کی مدعیت میں مقدمہ درج کیا گیا تھا، کوئٹہ پولیس عدالت سے اجازت ملنے کے بعد اسلام آباد کچہری سے حسان خان نیازی کو لے کر کوئٹہ روانہ ہوگئی، اس سے قبل کوئٹہ پولیس حسان خان نیازی کے راہداری ریمانڈ کے لیے اسلام آباد کچہری پہنچی تھی کیونکہ ان کے خلاف 18مارچ کو تھانہ ائیرپورٹ کوئٹہ میں مقدمہ درج کیا گیا تھا۔
خیال رہے کہ گزشتہ روز عدالت نے کارسرکار میں مداخلت کے مقدمے میں حسان نیازی کو 2 روزہ جسمانی ریمانڈ کے بعد پولیس کی استدعا مسترد کرتے ہوئے جوڈیشل ریمانڈ پر جیل بھیج دیا تھا، عدالت نے کہا تھا کہ14 روزہ جوڈیشل ریمانڈ مکمل ہونے کے بعد انہیں 6 اپریل کو عدالت میں پیش کرنے کا حکم دیا تھا۔
