کراچی(سٹاف رپورٹر ) بڑھتی مہنگائی پر قابو پانے کیلئے سندھ حکومت نے منفرد طریقہ اپنایا ہے، ذخیرہ اندوزوں اور منافع خوروں کے شر سے عوام کو محفوظ رکھنے کیلئے ترمیمی آرڈیننس پاس کیا گیا ہے۔
”پاکستان ٹائم “کے مطابق ذخیرہ اندوزوں اور منافع خوروں کی نشاندہی کرنے والوں کو انعام دینے کا فیصلہ کیا ہے ، صوبے میں اشیائے ضروریہ کی قیمتیں کنٹرول کرنے اور ذخیرہ اندوزی کے خلاف سندھ حکومت نے ترمیمی آرڈیننس جاری کردیا، جس کے مطابق ضلعی سطح پر ریونیو افسران کو پرائس چیکنگ کے خصوصی اختیارات دیے گئے ہیں اور کارروائی کے نتیجے میں اشیائے ضروریہ زائد قیمت پر فروخت کرنے والے اور ذخیرہ اندوز موقع پر گرفتار ہوسکیں گے۔
فیصلے کے مطابق اشیائے ضروریہ کی ذخیرہ اندوزی اور زائد قیمت پر فروخت کرنے والے عناصر جیل جانے کے ساتھ 2 لاکھ روپے تک جرمانہ بھی ادا کریں گے ، نیز کاروباری مقامات اور مراکز پر اشیائے ضروریہ کی سرکاری لسٹ رکھنا بھی لازمی قرار دیا گیا ہے اور لسٹ نہ رکھنے پر 10 ہزار روپے سے ایک لاکھ روپے تک فوری جرمانہ ہوگا۔
سندھ حکومت کی جانب سے گورنر سندھ کے دستخط کے ساتھ ترمیمی آرڈیننس جاری کر دیا گیا ہے ، جس میں کہا گیا ہے کہ ذخیرہ اندوزوں اور منافع خوری کرنے والوں کی اطلاع دینے والوں کو جرمان کا 10فیصد بطور انعام دیا جاے گا۔
