لاہور (سٹاف رپورٹر )لاہور کی انسداد دہشتگردی عدالت نے چیئرمین پاکستان تحریک انصاف (پی ٹی آئی) کو بڑا ریلیف دے دیا ہے، عدالت نے سابق وزیر اعظم کو 3 مقدمات میں عبوری ضمانت منظور کر لی ہے ۔
تفصیلات کے مطابق پی ٹی آئی چیئر مین عمران خان انسداد دہشتگردی عدالت میں پیش ہوئے جہاں ان کی 3 مقدمات میں عبوری ضمانت کی درخواست پر سماعت ہوئی ، عمران خان نے دائر درخواست میں کہا کہ شامل تفتیش ہونا چاہتا ہوں گرفتاری کا خدشہ ہے ، عدالت تینوں مقدموں میں عبوری ضمانت منظور کرے۔
عدالت نے عمران خان کی 4 اپریل تک عبوری ضمانت منظور کرتے ہوئے ایک لاکھ روپے کے ضمانتی مچلکے جمع کروانے کا حکم دیا، تفتیشی افسر سے آئندہ سماعت پر ریکارڈ طلب کرتے ہوئے عدالت نے آئندہ سماعت پر عمران خان کے وکیل کو کم لوگوں کے ساتھ پیش ہونے کی بھی ہدایت کی ، پولیس نے زمان پارک آپریشن کے تناظر میں عمران خان کے خلاف تھانہ ریس کورس میں مقدمات درج کررکھے ہیں۔
دوسری جانب انسداد دہشتگردی عدالت نے دہشتگردی کیس میں پی ٹی آئی رہنماوں فواد چوہدری ،حماد اظہر اور فرخ حبیب کی عبوری ضمانت منظور کرلی۔
