لاہور(وقائع نگار خصوصی) پاکستان مسلم لیگ(ن)کی چیف آرگنائزر مریم نواز شریف نے الزام عائد کیا ہے کہ عمران خان کو پاکستان میں عدم استحکام پیدا کرنے کیلئے لانچ کیا گیا،ملک میں انارکی پھیلانے کیلئے پنجاب اسمبلی توڑی گئی، کون ہے جو عمران خان کو تحفظ دے رہا ہے؟ہم الیکشن سے فرار نہیں چاہتے،ہم لڑیں گے اور جیتیں گے بھی،الیکشن کیلئے تیار ہیں لیکن لیول پلیئنگ فیلڈ چاہتے ہیں،کیا یہ لوگ محسن نقوی کی نگرانی میں ہونے والے انتخابات قبول کریں گے؟وکلا مسلم لیگ ن کا ہراول دستہ ہے،نوازشریف نے“ووٹ کو عزت دو“کا بیانیہ دیا اور وکلا نے اس بیانیے کو آگے بڑھایا، لائرز ونگ نے قانون اور آئین کیلئے آواز بلند کی۔
”پاکستان ٹائم“ کے مطابق لاہور میں لائرز ونگ سے خطاب میں مریم نواز شریف نے وکلا سے مدد مانگتے ہوئے کہا مجھے اور پاکستان کو آپ کی مدد کی ضرورت ہے،اگر کوئی سہولت کاری کرتا ہے تو آپ فوری طور پر اس کو جواب دیں،کیا آئین توڑنا پاکستان میں چھوٹا جرم ہے؟آئین توڑنے والے کو آپ نے گھر جانے دیا ؟آئین توڑنے والے پر آرٹیکل 6 لگنا چاہیے، قاسم سوری کی رولنگ غیرآئینی تھی،ملک کی موجودہ صورتحال کا ذمہ دار صرف عمران خان ہے،جنرل(ر)قمرباجوہ نے بتایا کہ بیگمات کے کہنے پر یہ فیصلے ہوتے ہیں،اسٹیبلشمنٹ کی مدد سے اس نے اپنا فارن فنڈنگ کیس نہیں کھلنے دیا، آئین توڑنے والے کے خلاف سپریم کورٹ میں پٹیشن دائر ہونی چاہیے،اسمبلی کو جس شخص نے بچوں کا کھیل سمجھا اس کے فیصلوں پر ملک کیسے چلے گا؟کیا اسمبلیاں توڑنا بچوں کو کھیل ہے جب چاہے توڑ دیں؟عدلیہ کی عزت اس کے فیصلے ہوتے ہیں۔مریم نواز نے کہا 25 ممبران تحریک انصاف کی جھولی میں ڈالنے کیلئے آپ نے آئین کو ری رائٹ کیا،کہا جا رہا ہے الیکشن میں تاخیر آئین کی خلاف ورزی ہے،آپ کے منہ سے ایسی بات اچھی نہیں لگتی،کیا یہ لوگ محسن نقوی کی نگرانی میں ہونے والے انتخابات قبول کریں گے؟اگر ن لیگ پنجاب میں کامیاب ہوجاتی ہے تو پھر یہ لوگ کیا کریں گے؟کیا کبھی کسی نے سنا کہ آدھے ملک میں نگران حکومت ہو اور آدھے میں نہ ہو؟۔
مریم نواز نے کہا پی ٹی آئی کی سیاست سہولت کاروں کے ارد گرد گھومتی ہے، اس شخص نے قانون کو پاوں کے نیچے روندا،پاکستان میں کسی کو ایسی سہولتیں نہیں دی گئیں جو اس کو ملیں،ابھی نواز شریف کے مقابلے میں تو اسے ہاتھ بھی نہیں لگایا گیا،یہ شخص جتھے لیکر لاہو ہائیکورٹ اور جوڈیشل کمپلیکس گیا،قانون اور آئین کا اتنا بڑا مذاق میں نے پہلے کبھی نہیں دیکھا،عمران خان کو 12،12 مقدموں میں ضمانت ملتی ہے،جانتے تھے کہ کیس جھوٹے ہیں لیکن پھر بھی شریف شہری کی طرح عدالت گئے،یہ پہلا شخص ہے جس نے توشہ خانہ سے تحفہ چوری کیا،پاکستان کی تاریخ میں کسی حکمران نے تحفہ چوری نہیں کیا،دبئی میں تحفہ بیچا گیا،منی لانڈرنگ کے ذریعے پیسے پاکستان لائے گئے،نواز شریف جھوٹے مقدمات میں بھی عدالت میں پیش ہوتے رہے،ہم نے کورٹ کے آگے سرنڈر کیا،جھوٹی سزائیں بھگتیں۔
انہوں نے کہا لیکن جب پولیس زمان پارک عدالت کے حکم پر عملدرآمد کرنے جاتی ہے تو اس پر پیٹرول بم پھینکے گئے، پولیس والوں پر تشدد کیا گیا،زمان پارک سے ریاست پر حملہ ہوا،باقیوں سے سوتیلا سلوک یہاں لاڈلے والا سلوک کیوں ہو رہا ہے؟میں سمجھتی ہوں الیکشن کے علاوہ کوئی حل نہیں،ہر پانچ سال بعد الیکشن ہونے چاہئیں،میری والدہ کی سیٹ پر الیکشن کے دوران آپ نے بہت مدد کی،سب کچھ یاد ہے،شکرگزار ہوں دل کی گہرائیوں سے،نوا ز شریف کے ساتھ ناانصافیاں کی گئیں،نواز شریف کے بیانیے کو آگے بڑھانے میں آپ کا کردار بہت نمایاں ہے،رانا ثنا اللہ کو خراج تحسین پیش کرتی ہوں،آپ نے نعرہ دیا کہ یہ جو کالا کوٹ ہے،میاں تیرا ووٹ ہے،لیڈر شپ کے لیول پر آپ کو وہ رسائی نہیں دی گئی جو آپ کا حق تھا،آپ ملک کے آئین اور قانون کو جانتے ہیں،آپ بہتر کردار ادا کر سکتے ہیں،آپ میرے اور ملک کے مدد گار ہوسکتے ہیں،آپ کے ساتھ نہ چلنا اپنا نقصان ہے،الیکشن میں تاخیر کے باعث آپ سے ملنے کا موقع ملا ہے،ہمیں ملکی حالات اور حقائق کو زیر بحث لایا جانا چاہیے،میں کہتی رہی ہوں کہ ترازو کے پلڑے برابر ہونے چاہئیں،ہم لوگ الیکشن سے نہیں ڈرتے،ہم الیکٹ ہو کر آتے ہیں،سلیکٹ ہو کے نہیں آتے،پی ٹی آئی کی ساری سیاست تقرریوں کے ارد گرد گھومتی ہے،جنرل(ر) باجوہ نے بتایا کہ لانے والے وہ ہیں لیکن یہ خطرناک آدمی ہے،اب ان کی جو باقیات ہیں یہ ان پر تکیہ کرکے بیٹھے ہیں۔
