ایف بی آر ملازم نے وزیر اعظم شہباز شریف سے کرپشن کی اجازت مانگ لی

اسلام آباد(وقائع نگار)فیڈرل بورڈ آف ریونیو (ایف بی آر) کے ان لینڈ ریونیو ملازم نے وزیر اعظم شہباز شریف کو خط لکھ کر کرپشن کرنے کی اجازت مانگ لی۔
”پاکستان ٹائم “ کے مطابق فیڈرل بورڈ آف ریونیو (ایف بی آر) کے ان لینڈ ریونیو ملازم نے وزیر اعظم شہباز شریف کوخط لکھتے ہوئے کہا کہ مہنگائی کے باعث گھریلو اخراجات تنخواہ سے پورے نہیں ہو رہے،گھریلو اخراجات ایک لاکھ 10 ہزار 500 روپے تک جبکہ تنخواہ کم ہے، تنخواہ نہیں بڑھائی تو کرپشن کرنے کی اجازت دی جائے،مہنگائی اور اخراجات بڑھنے کے باعث مستقبل کے لیے کوئی جمع پونجی نہیں ہے۔
ان لینڈ ریونیو ملازم کی جانب سے لکھے جانے والے خط میں کہا گیا کہ قومی احتساب بیورو( نیب)وفاقی تحقیقاتی ادارے(ایف آئی اے)وزیر اعظم آفس سمیت دیگر اداروں کے ملازمین کی تنخواہ زیادہ ہے،کم تنخواہ اور مہنگائی کے باعث گھریلو اخراجات پورے کرنا ممکن نہیں رہا۔وزیر اعظم کو لکھے گئے خط میں کہا گیا کہ ایف بی آر ان لینڈ ریونیو ملازمین کےلیے ایگزیکٹو الاونس فراہم کیا جائے۔