لندن(مانیٹرنگ ڈیسک )برطانیہ کی سیاسی تاریخ میں پہلی بار کوئی پاکستانی نژاد اور مسلمان سیاستدان سکاٹ لینڈ کا فرسٹ منسٹر(وزیراعلیٰ)مقرر ہوا ہے۔
”پاکستان ٹائم “کے مطابق حمزہ یوسف گلوسگو میں پولک سے رکن سکاٹش پارلیمنٹ ہیں اور اب وہ سکاٹس لینڈ کے نئے فرسٹ منسٹر یعنی سکاٹش حکومت کے سربراہ ہوں گے،اس حوالے سے بتایا گیا کہ 37 سالہ حمزہ یوسف نئے منصب پر فائز ہونے کے بعد برطانوی سیاسی جماعت کے پہلے مسلمان اور پاکستانی نژاد لیڈر بن گئے ہیں۔
مقامی میڈیا کے مطابق حمزہ یوسف سکاٹش پارلیمنٹ سے 28 مارچ بروز منگل کو اعتماد کا ووٹ حاصل کریں گے اور فرسٹ منسٹر بن جائیں گے۔اس سے قبل وہ وزیر صحت کی حیثیت سے فرائض انجام دے چکے ہیں۔وہ محض 26 برس کی عمر میں سکاٹش پارلیمنٹ کا رکن بنے اور انہیں پارلیمنٹ کا کم عمر ترین رکن کا اعزاز بھی حاصل ہے۔پاکستانی نژاد حمزہ یوسف سکاٹش کابینہ میں وزیر انصاف اور ٹرانسپورٹ بھی رہ چکے ہیں۔
واضح رہے کہ حمزہ یوسف کا تعلق پاکستان کے ضلع میاں چنوں سے ہے اور ان کے والدین 1970 میں پاکستان سے ہجرت کر کے لندن چلے گئے تھے۔
